Jaguar Land Rover-ge jasalǵan kıbershabýyl shyǵyny 2,5 mlrd dollardan asty

ASTANA. KAZINFORM – Tamyz aıynyń sońynda avtokólik óndirýshi Jaguar Land Rover (JLR) kompanııasyna jasalǵan kıbershabýyl saldarynan kelgen shyǵyn shamamen 1,9 mıllıard fýnt sterlıngti (2,53 mıllıard AQSh dollary) qurady. Bul – Ulybrıtanııa tarıhyndaǵy ekonomıkalyq saldary eń aýyr kıbershabýyl, dep habarlaıdy Kazinform VVS agenttigine silteme jasap.

Bul týraly Cyber Monitoring Centre (CMC) sarapshylary málimdedi. Shabýyldan keıin JLR kompanııasynyń búkil álem boıynsha IT-júıeleri isten shyǵyp, óndiris bes apta boıy toqtap qaldy. Al bul keleńsizdik jetkizý júıesiniń bárine áser etti. Jalpy alǵanda bes myńǵa jýyq kompanııa zardap shekti, al tolyq qalpyna keltirý jumystary 2026 jyldyń qańtarynan erte bolmaıdy dep boljanýda.

Zalaldyń jartysynan astamyn JLR-diń ózi kótermek – bul óndiristiń toqtap qalýynan bolǵan shyǵyn men qalpyna keltirý sharalaryna jumsalatyn qarajat. Qalǵan bóligi jetkizýshiler men jergilikti ekonomıkaǵa túsetin aýyrtpalyq retinde baǵalanyp otyr.

Kompanııa CMC baǵalaýlaryna túsinikteme berýden bas tartqan, alaıda óndiristiń birtindep qaıta jandanǵanyn rastady.

Sarapshylar bul oqıǵany búkil bıznes úshin dabyl qaǵarlyq belgi dep atap ótti jáne senimdi kıberqaýipsizdik júıesiniń mańyzdylyǵyn erekshe atap kórsetip otyr.

Aıta ketsek, Jaguar Land Rover táýligine 1000-nan astam kólik shyǵarady. Kompanııanyń zaýyttary Ulybrıtanııadaǵy Solıhall jáne Heılvýd qalalarynda ornalasqan, qozǵaltqysh óndirisi Výlverhemptonda júrgiziledi. Sondaı-aq kompanııanyń Slovakııa, Qytaı jáne Úndistanda kásiporyndary bar. Jaguar Land Rover úndistandyq Tata Motors kompanııasyna tıesili.

JLR-ge jasalǵan kıbershabýyl – bıyl Ulybrıtanııada tirkelgen alǵashqy iri hakerlik oqıǵa emes. Kóktemde M&S pen Co-op dúkender jelileri de kıbershabýylǵa ushyraǵan. Sondaı-aq áıgili Harrods ámbebap dúkeni de hakerlerdiń nysanasyna aınaldy.