Jańa Dala / Green Day ’2026 Dala kúni 16–17 shildede ótedi
ASTANA.KAZINFORM – Aqmola oblysy Tselınograd aýdanynyń Nuresil aýylynda ósimdik jáne mal sharýashylyǵy salasyndaǵy Qazaqstandaǵy eń iri salalyq is-sharalardyń biri – «Qazaqstandyq Jańa Dala / Green Day ’2026 Dala kúni» mamandandyrylǵan kórme-demonstratsııasy ótedi. Bul týraly Aýyl sharýashylyǵy mınıstrligi habarlady.
Birinshi kúnniń iskerlik baǵdarlamasy aıasynda aýyl sharýashylyǵy ónimderin qaıta óńdeý, egindi saqtandyrý jáne agroazyq-túlik brendterin damytý máselelerine arnalǵan «Qosylǵan qun: egistikten tutynýshyǵa deıingi jol» atty agrarlyq forým uıymdastyrylady.
«Ulttyq agrarlyq ǵylymı-bilim berý ortalyǵy» jáne onyń enshiles uıymdary ǵylymdaǵy sońǵy jetistikterin, aýyl sharýashylyǵy daqyldarynyń jańa sorttaryn, sondaı-aq ónimdi qaıta óńdeý salasyndaǵy ázirlemelerin tanystyrady. Kórme alqaptarynda traktorlar, egis keshenderi, búrikkishter jáne topyraq óńdeýge arnalǵan jabdyqtar sııaqty zamanaýı aýyl sharýashylyǵy tehnıkasy dala jaǵdaıynda is júzinde kórsetiledi.
Sonymen qatar aýyl sharýashylyǵy drondarynyń jumysy tanystyrylady. Mal sharýashylyǵy baǵdarlamasy aıasynda Angýs, Áýlıekól, Gereford, Qazaqtyń aqbas sıyry, Qalmaq jáne Obrak tuqymdarynyń asyl tuqymdy maldary arasynda baıqaýlar men tuqymdyq mal kórsetilimderi ótedi. Olardyń qorytyndysy boıynsha asyl tuqymdy buqashyqtardy satýǵa arnalǵan ashyq aýktsıon ótkiziledi.
Jeke baǵyt retinde iri qara maldy qoldan uryqtandyrý salasynyń mamandary arasynda «Úzdik qoldan uryqtandyrý tehnıgi» kásibı baıqaýy uıymdastyrylady.
Ekinshi kúni Ortalyq Azııadaǵy organıkalyq óndiristi damytý máselelerine arnalǵan «ORGANIC CENTRAL ASIA 2026» forýmy, sondaı-aq FASEP jobasy aıasynda turaqty aýyl sharýashylyǵy salasyndaǵy Qazaqstan men Frantsııa arasyndaǵy yntymaqtastyqqa arnalǵan konferentsııa ótedi. Sonymen qatar qonaqtar úshin «Apı-domık» tanystyrylatyn omartashylyq kórmesi uıymdastyrylady.
Aıta keteıik, Almatyda aqyldy tehnologııalarǵa arnalǵan Qazaqstan-Qytaı halyqaralyq kórmesi óz jumysyn bastady.
