Izraıldiń Somalılendti táýelsiz memleket retinde tanýy ne úshin daý týdyrdy

ASTANA. KAZINFORM — Izraıl Somalıden bólinip shyqqan Somalılendti táýelsiz memleket retinde taný jóninde daýly sheshim qabyldap, kóptegen eldiń narazylyǵyn týǵyzdy. Bul týraly VVS jazdy.

Bul sheshimdi aıyptaǵan sońǵy el – Qytaı. Qytaı Syrtqy ister mınıstrliginiń resmı ókili Lın Tszıan jýrnalısterge:

«Eshbir el óz múddesi úshin basqa memleketterdiń ishki separatıstik kúshterin qoldamaýy kerek nemese soǵan dem bermeýi tıis», dep málimdedi.

Qytaı bul ustanymyn BUU Qaýipsizdik Keńesi Izraıldiń sheshimine baılanysty shuǵyl otyrys ótkizer aldynda jarııalady.

Juma kúni Izraıl Somalılendti táýelsiz respýblıka retinde resmı túrde moıyndaǵan álemdegi alǵashqy memleket bolyp otyr. Bul – aımaqtyń Somalıden táýelsizdigin jarııalaǵanyna 30 jyldan astam ýaqyt ótken soń jasalǵan qadam.

Somalılend prezıdenti bul oqıǵany «tarıhı sát» dep atady, alaıda Somalı Izraıldiń áreketin óz egemendigine jasalǵan shabýyl retinde qatań aıyptady.

Sonymen qatar Túrkııa, Saýd Arabııasy jáne Afrıka odaǵy sııaqty ondaǵan memleket pen halyqaralyq uıym Izraıldiń kútpegen bul málimdemesin aıyptady.

Somalılend nelikten táýelsizdikke umtylyp keledi

Aden shyǵanaǵy jaǵalaýynda ornalasqan, jer aýmaǵy negizinen shóleıtti aımaq bolyp keletin Somalılend 1991 jyly Somalıdegi áskerı dıktator Sıad Barreniń bıligi qulatylǵannan keıin táýelsizdigin jarııalady.

Bul qadam Sıad Barre rejımine qarsy júrgizilgen separatıstik kúresten keıin jasaldy. Sol kezde úkimet kúshteri aımaqtaǵy kóterilisshi jasaqtardy qýdalap, saldarynan ondaǵan myń adam qaza taýyp, kóptegen qalalar jermen-jeksen boldy.

Halyqaralyq deńgeıde resmı túrde tanylmaǵanyna qaramastan, Somalılendte jumys istep turǵan saıası júıe, memlekettik mekemeler, polıtsııa kúshi jáne óz ulttyq valıýtasy bar.

Eske sala ketsek, Netanıahý Irandy Izraılge qarsy áreket etse, qatań jaýap qaıtarylatynyn eskertti.