Izraıldiń soqqysynan Gazada taǵy 40 adam mert boldy

ASTANA. KAZINFORM — Izraıldiń Gaza sektorynyń ońtústigindegi Han-ıÝnıs aýdandarynyń birine jasaǵan soqqysynan keminde 40 adam qaza taýyp, 60-y jaraqat alǵan, dep habarlaıdy HAMAS baqylaýyndaǵy Gaza azamattyq qorǵanys basqarmasy. Izraıldiń málimdeýinshe, soqqy sodyrlardyń basqarý ortalyǵyna baǵyttalǵan, dep jazady VVS. 

Aqparatqa sáıkes, soqqy bosqyndarǵa arnalǵan shatyrly lager ornalasqan Ál-Mavası aýdanynda jasaldy.

«Bizdiń ekıpajdar kóshirilgen adamdardyń shatyrlaryna jasalǵan shabýyldan iz-tússiz joǵalǵan 15 adamdy tabý úshin áli jumys istep jatyr», — dedi AFP agenttigine Gaza azamattyq qorǵanys basqarmasynyń ókili Mohammed ál-Mýgaır.

Kýágerlerdiń habarlaýynsha, tún ortasynan keıin kóp uzamaı Ál-Mavası aımaǵynda kúshti jarylystar estilip, aspandy jalyn sharpydy. 

Soqqy jasalǵan jerge jaqyn turatyn qaıyrymdylyq uıymynyń eriktisi Haled Mahmýdtyń aıtýynsha, ol jáne basqa eriktiler kómektesýge asyqty, biraq oqıǵanyń aýqymy tańqaldyrdy.

«Soqqy saldarynan tereńdigi jeti metrlik úsh shuńqyr paıda bolǵan, 20-dan astam shatyr sonda kómilip qaldy», — dedi ol telefon arqyly BBC-ge.

Gaza azamattyq qorǵanysynyń ókili Mahmýd Bassaldiń aıtýynsha, Ál-Mavası aımaǵynda 200-den astam shatyr bolǵan jáne onyń 40 shaqtysy qıraǵan.

Ol sondaı-aq aımaqtaǵy palestınalyqtarǵa soqqy týraly aldyn ala eskertý jasalmaǵanyn qosyp ótti.

HAMAS-qa baǵynyshty Gaza densaýlyq saqtaý mınstrliginiń málimetinshe, byltyrǵy qazannan beri Gazada 40 900 shamasynda halyq mert bolǵan.