Izraıldiń SІM basshysy Somalılendke bardy
ASTANA. KAZINFORM – Izraıl dıplomatııasy basshysynyń sapary Tel-Avıvtiń halyqaralyq deńgeıde rezonans týdyrǵan sheshiminiń jalǵasy bolatyn, dep habarlaıdy Kazinform menshikti tilshisi.
Izraıldiń Syrtqy ister mınıstri Gıdeon Saar Somalılendke resmı saparmen bardy jáne bul Izraıl basshylyǵynyń atalǵan aýmaqty táýelsiz el dep moıyndaǵannan keıingi alǵashqy sapary bolyp otyr.
Bul týraly Somalılendtiń aqparat mınıstrligi habarlady.
Vedomstvonyń habarlaýynsha, Saardy Hargeısa áýejaıynan jergilikti bıliktiń joǵary deńgeıli shendileri kútip aldy. Sapar barysynda ol Somalılend prezıdenti Abdırahman Mohammed Abdýllahımen kezdesip, kelissóz júrgizbekshi.
Izraıl Syrtqy ister mınıstrligi bul sapar týraly resmı habar taratpady. 2025 jyldyń 25 jeltoqsanynda Izraıl Somalılend Respýblıkasyn táýelsiz el retinde moıyndaǵan BUU-nyń alǵashqy múshesi boldy.
Bul moıyndaý osy eldiń 1991 jyly Somalıden birjaqty bólinip shyqqanynan soń 30 jyldan keıin bolyp otyrǵan oqıǵa.
Izraıldiń bul sheshimi týraly Somalı, Taıaý Shyǵys pen Afrıkanyń birqatar eli negatıvti pikir bildirdi.
Bul qadamdy Eýropa odaǵy da synady. Halyqaralyq deńgeıde keń kólemde moıyndalmasa da Somalılendte keıingi jyldary Ulybrıtanııa, Efıopııa, Túrkııa, BAÁ, Danııa, Kenııa sııaqty birqatar eldiń ókildikteri jumys istep keldi.
Somalılend Afrıka múıisinde, Aden shyǵanaǵynyń jaǵalaýynda, Iemenniń qarsy betinde ornalasqan. Bul onyń óńirlik jáne geosaıası turǵydan strategııalyq mańyzyn aıqyndaı túsedi.
Osyǵan deıin Izraıldiń Somalılendti táýelsiz memleket retinde tanýy ne úshin daý týdyrǵany týraly jazdyq.