Izraıldiń Sırııadaǵy áýe shabýylynan 14 adam qaza tapty

ASTANA. KAZINFORM – Jeksenbi kúni Sırııanyń ortalyǵynda Izraıl áýe kúshteriniń soqqysy saldarynan keminde 14 adam qaza taýyp, taǵy 43 adam jaraqat aldy.

Jeksenbi kúni keshki saǵat 23:20 shamasynda ızraıldik qarsylas Lıvannyń soltústik-batysynan (Sırııa) ortalyq aımaqtaǵy birqatar áskerı nysandardy nysanaǵa alyp, áýe shabýylyn bastady, dep habarlaıdy sırııalyq SANA aqparattyq agenttigi áskerı derekkózge silteme jasap.

Jeksenbi kúni keshke jasalǵan shabýyl sońy Sırııanyń ortalyǵy Hama provıntsııasyndaǵy Masıaf qalasynyń mańynda órtke ulasyp, birshama materıaldyq shyǵynǵa ákep soqty. Jergilikti densaýlyq saqtaý uıymdary shabýyldan 43 adam jaralanǵanyn, olardyń keıbiriniń jaǵdaıy aýyr ekenin aıtty.

Masıaf qalasyndaǵy ulttyq aýrýhana dırektory Feısal Haıdar zardap shekkender arasynda beıbit turǵyndar da bar ekenin aıtty.

Zymyrandardyń bir bóligin Sırııanyń áýe qorǵanys júıesi atyp túsirgeni habarlandy. Zymyran shabýyly sonymen birge Vadı el-Eıon jáne Heır Abbas aýdandaryndaǵy ormandy aımaqtarda eki órt tutandyrdy. Qazir órt sóndirýshiler onymen kúresip jatyr.

Reuters agenttiginiń habarlaýynsha, Masıafqa jaqyn jerde ornalasqan hımııalyq qarý shyǵaratyn iri áskerı zertteý ortalyǵyna soqqy berilgen. Bul nysanda qarý-jaraq óndirýmen aınalysatyn ırandyq áskerı sarapshylar toby jumys istep jatyr degen boljam bar.