Izraıldiń ortalyq banki valıýta baǵamyn turaqtandyrý úshin ınterventsııa jasamaq
Izraıldiń ortalyq banki valıýta baǵamyn turaqtandyrý úshin 30 mlrd dollarǵa ınterventsııa jasamaq, dep habarlaıdy Kazinform agenttigi.
«Izraıl Banki 30 mlrd dollar somasynda sheteldik valıýtany satý baǵdarlamasyn jarııalaıdy. Bank bul kezeńde shekeldiń aıyrbas baǵamynyń qubylmalylyǵyn jeńildetip, naryqtaǵy ótimdiligin qamtamasyz etý baǵytynda jumys isteıtin bolady», – delingen resmı málimette.
Izraıl Banki 30 mlrd dollarlyq ınterventsııa jaǵdaıdy turaqtandyrmasa, qosymsha sharalar qabyldaýǵa ázir ekenin málim etken.
«Bank 30 mlrd dollarlyq baǵdarlamadan bólek, qajet bolǵan jaǵdaıda, naryqqa SWAP mehanızmi arqyly 15 mlrd dollarǵa deıin ótimdilik usynady. Izraıl Banki oqıǵalardyń órbý barysyn qadaǵalap otyrady jáne qajettiligine qaraı qoldaǵy quraldardyń bárin qoldana otyryp áreket etedi», - dep jazylǵan Izraıl Bankiniń resmı saıtynda.
