Izraıldiń Lıvannyń ońtústigine jasaǵan soqqylarynan keminde 14 adam qaza tapty
ASTANA. KAZINFORM – Senbi kúni Izraıldiń Lıvannyń ońtústigine jasaǵan soqqylary saldarynan keminde 14 adam, onyń ishinde Lıvan armııasynyń úsh áskerı qyzmetkeri qaza tapty. Bul týraly Lıvannyń Ulttyq aqparat agenttigi habarlady.
Lıvan armııasynyń málimetinshe, úsh sarbaz Hardalı–Kfar-Tebnıt joly boıynda patrýldik kólikpen júrgen kezde qaza tapqan.
Izraıl qorǵanys armııasy bul oqıǵaǵa qatysty tergeý bastalǵanyn málimdedi. Áskerılerdiń aıtýynsha, kólik belsendi urys qımyldary júrip jatqan aımaqta anyqtalǵan. Barlaý derekteri boıynsha, sol aýmaqta Hezbolla tarapynan qaýip bolýy múmkin edi.
TsAHAL óz operatsııalarynyń Lıvan armııasyna emes, «Hezbolla» qozǵalysyna qarsy baǵyttalǵanyn atap ótti.
Lıvandaǵy BUU ýaqytsha kúshteri shabýyldy Lıvannyń egemendigine, aýmaqtyq tutastyǵyna jáne BUU Qaýipsizdik Keńesiniń 1701-qararyna jasalǵan «óreskel buzýshylyq» dep baǵalady.
Lıvan parlamentiniń spıkeri Nabıh Berrı TsAHAL-dyń túsindirmesin joqqa shyǵaryp, bul soqqyny «esh jaǵdaıda qatelik nemese kezdeısoq oqıǵa emes» dep atady.
Aldyn ala málimet boıynsha, Izraıl avıatsııasynyń Saksaqııa qalasyna jasaǵan taǵy bir soqqysy saldarynan alty adam qaza tapqan. Budan bólek, Lıvannyń ońtústigindegi birneshe eldi mekenge jasalǵan jekelegen shabýyldardan taǵy bes adam kóz jumdy.
Lıvan Densaýlyq saqtaý mınıstrligi janyndaǵy tótenshe operatsııalar ortalyǵynyń málimetinshe, 2 naýryzdan beri Izraıl soqqylary saldarynan 3 593 adam qaza taýyp, 10 990 adam jaralanǵan.
Aıta keteıik, buǵan deıin Izraıl Lıvanǵa qaıtadan áýe soqqylaryn jasaǵanyn jazdyq.
