Izraıldiń Lıvannyń ońtústigine shabýylynan Sırııa turǵyny mert boldy
ASTANA. KAZINFORM – Lıvannyń ońtústigindegi Saıda qalasynan ońtústikke qaraı Zahranı-Nabatııa jolynyń boıynda Msaıle aýdanynda jergilikti ýaqyt boıynsha tańǵa saǵat 4:00-der kezinde Izraıl tarapynan jasalǵan soqqylardyń saldarynan Sırııa azamaty mert bolyp, taǵy 7 adam jaraqat aldy, dep habarlaıdy ıtalııalyq agenzianova.
Bul týraly Lıvan Densaýlyq saqtaý mınıstrliginiń shuǵyl operatsııalar ortalyǵy habarlady.
Vedomstvonyń málimetinshe, jaralanǵandardyń arasynda bir sırııalyq jáne alty Lıvan azamaty bar, onyń ekeýi áıel. Shabýyldar Lıvan parlamenti spıkeri Nabıh Berrıdiń Msaıledegi rezıdentsııasynan birneshe júz metr qashyqtyqta bolǵan.
Lıvan prezıdenti Jozef Aýn bul oqıǵaǵa baılanysty málimdeme jasap, Izraıldiń áreketterin aıyptady.
«Ońtústik Lıvan taǵy da eshqandaı sebepsiz jáne aqtaýǵa kelmeıtin Izraıldiń azamattyq nysandarǵa qarsy agressııasyna ushyrady», — dedi ol.
Prezıdenttiń aıtýynsha, sońǵy shabýyldyń qaýiptiligi — ol Gaza sektorynda atysty toqtatý týraly kelisim jasalǵannan keıin bolǵanynda.
Izraıl Qorǵanys armııasy (TsAHAL) óz kezeginde Lıvannyń ońtústiginde «Hezbolla» qozǵalysynyń terrorıstik ınfraqurylymyn joıý boıynsha operatsııa júrgizgenin habarlady.
Málimdemede: «Hezbolla» el aýmaǵynda terrorıstik ınfraqurylymdy qalpyna keltirýge tyrysyp, beıbit turǵyndardy tiri qalqan retinde paıdalanýdy qoıar emes. Izraıl Qorǵanys armııasy memleket qaýipsizdigine tóngen kez kelgen qaterdi joıý jumysyn jalǵastyrady», — delingen.
Lıvandyq L'Orient le Jour gazetiniń málimetinshe, joıǵysh ushaqtar qurylys tehnıkasy saqtalǵan nysanǵa onǵa jýyq zymyran atqan. Jarylystardyń daýysy Saıda, Nabatııa qalalarynda jáne Zahranı ózeni boıyndaǵy birneshe aýylda estilgen.
Lıvannyń memlekettik NNA aqparat agenttiginiń habarlaýynsha, soqqylar nátıjesinde 300-den astam qurylys tehnıkasy, sonyń ishinde 100-den astam shaǵyn Bobcat markaly mashınalar joıylǵan. Zaqymdanǵan nysandar Lıvandaǵy eń iri jáne mańyzdy tehnıkalyq qoımalardyń biri bolyp sanalady, al keltirilgen zalal júzdegen mıllıon dollar dep baǵalanyp otyr.
27 qarasha 2024 jyldan bastap kúshine engen atysty toqtatý rejımine qaramastan, Izraıl Lıvan aýmaǵyndaǵy shabýyldaryn jalǵastyryp keledi. Izraıl tarapy olardyń nysanasy eldiń ońtústiginde ornalasqan «Hezbolla» qozǵalysynyń sodyrlary men ınfraqurylymy ekenin málimdedi.
BUU dereginshe, atysty toqtatý kúshine engennen beri Lıvanda 103 beıbit turǵyn qaza tapqan.
Osyǵan deıin BUU Lıvandaǵy bitimgerlik mıssııasyn aıaqtaıtyny týraly jazdyq.