Izraıldiń Lıvanǵa jasaǵan soqqysynan bes adam qaza tapty
ASTANA. KAZINFORM - Izraıldiń Lıvannyń ońtústigine, Bekaa óńirine jáne astanasy Beırýtqa jasaǵan shabýyldary saldarynan bes adam qaza tapty, dep jazady Anadoly.
Lıvannyń resmı NNA agenttiginiń habarlaýynsha, Izraıldiń ushqyshsyz ushaǵy eldiń ońtústigindegi Sýr qalasynda kólikke soqqy jasaǵan. Shabýyl saldarynan bir adam kóz jumdy.
Bekaa óńiriniń ortalyq bóligindegi Ber Elııas aýdanynda turǵyn úıge jasalǵan shabýyldan Lıvan Islam qaýymdastyǵynyń ókili ıÝsýf ád-Dahýk jaraqat aldy, al onyń eki uly qaza tapty.
Nabatııa provıntsııasynyń quramyndaǵy Aba eldi mekeninde turǵyn úıge jasalǵan soqqydan bir áıel mert boldy, onyń kúıeýi jaralanǵan.
Beırýttyń ońtústigindegi Djınah aýdanynda kólikke jasalǵan taǵy bir shabýyl saldarynan bir adam qaza tapty.
Aıta keteıik, Izraıl «Hezbolla» uıymynyń zymyran shabýylyna jaýap retinde Lıvanǵa birqatar soqqy jasaǵan bolatyn.
