Izraıldiń Lıvanǵa jasaǵan shabýyldarynan qaza tapqandar sany 4 303 adamǵa jetti
ASTANA. KAZINFORM – Izraıldiń 2 naýryzdan beri Lıvanǵa jasaǵan shabýyldary saldarynan qaza tapqandar sany 4 303 adamǵa jetti, dep habarlaıdy Anadolu.
Lıvannyń Densaýlyq saqtaý mınıstrligi Izraıldiń 2 naýryzdan beri jasap jatqan shabýyldary saldarynan qaza tapqandar men zardap shekkender týraly sońǵy málimetterdi jarııalady.
Mınıstrliktiń dereginshe, atalǵan kezeńde qaza tapqandar sany ótken táýlikpen salystyrǵanda taǵy eki adamǵa artyp, 4 303-ke jetken. Al jaralanǵandar sany 12 202 adamdy qurady.
3 shildede jarııalanǵan málimette Izraıldiń 2 naýryzdan beri jasaǵan shabýyldarynan 4 301 adamnyń qaza tapqany habarlanǵan edi.
Izraıl aımaqta jarııalanǵan bitimge jáne AQSh pen Iran arasyndaǵy, Lıvan da qamtylǵany aıtylǵan kelisimge qaramastan, áskerı operatsııalaryn jalǵastyryp otyr.
Lıvannyń resmı NNA agenttiginiń habarlaýynsha, Izraıldiń áskerı tikushaǵy eldiń ońtústigindegi Medjdel-Zýn eldi mekenine bes zymyran atqan. Sonymen qatar ushqyshsyz ushý apparaty Lıvannyń ońtústigindegi Bınt-Djýbeıl aýdanyna qarasty ıAtır eldi mekenine dybystyq bomba tastaǵan.
Eske salsaq, 2 naýryzda Izraıl áskeri Lıvan aýmaǵyna jappaı áýe soqqylaryn bastap, eldiń ońtústigindegi birqatar eldi mekendi baqylaýǵa alǵan edi.
Lıvan úkimetiniń málimetinshe, áskerı is-qımyldar saldarynan el ishinde májbúrli túrde qonys aýdarǵandar sany 1 mıllıon adamnan asty.
AQSh prezıdenti Donald Tramp 24 sáýirde 17 sáýirden bastap kúshine engen Lıvan men Izraıl arasyndaǵy 10 kúndik ýaqytsha bitimdi taǵy úsh aptaǵa uzartqanyn jarııalady.
14–15 mamyr kúnderi AQSh-tyń araǵaıyndyǵymen ótken kelissózderdiń úshinshi kezeńiniń qorytyndysy boıynsha taraptar 17 mamyrdan bastap atysty toqtatý rejımin taǵy 45 kúnge uzartýǵa kelisti.
14 maýsymda Iran men AQSh Pákistannyń araǵaıyndyǵymen ótken kelissózder barysynda soǵysty toqtatý jáne kelispeýshilikterdi kelissóz arqyly retteýdi kózdeıtin 14 tarmaqtan turatyn kelisimge qol jetkizgenin habarlady. Kelisim Lıvandaǵy áskerı qımyldardy toqtatýdy da qamtydy.
26 maýsymda Vashıngtonda ótken Izraıl men Lıvan arasyndaǵy tikeleı kelissózderdiń besinshi kezeńiniń qorytyndysynda taraptar «negizdemelik kelisimge» qol qoıdy.
Sondaı-aq Eýropalyq Odaq Lıvan men Izraıl arasyndaǵy kelisimdi quptaıtynyn málimdedi.
