Izraıldiń Lıvanǵa jasaǵan shabýyldarynan qaza tapqandar sany 23 adamǵa jetti
ASTANA. KAZINFORM – Izraıldiń Lıvannyń ártúrli aımaqtaryna túnnen beri jasaǵan shabýyldary saldarynan qaza tapqandar sany 23 adamǵa jetti. Olardyń ishinde 12 medıtsına qyzmetkeri bar, dep habarlady Anadolý agenttigi.
Bul týraly Lıvannyń Ulttyq aqparat agenttigi habarlady. Agenttik málimetinshe, Izraıl áskeriniń Lıvannyń ońtústigindegi Hara-Saıda aýdanyndaǵy turǵyn úıge jasaǵan soqqysy saldarynan tórt adam qaza tapqan.
Sonymen qatar Izraıl avıatsııasy Taıbe eldi mekenindegi úılerdiń birine soqqy jasaǵan. Alaıda bul shabýyldan zardap shekkender týraly aqparat túsken joq.
En-Nabatııa provıntsııasyndaǵy Rahıbeler aýdanyna jasalǵan Izraıl shabýyly saldarynan jeti adam qaza taýyp, kóptegen adam jaraqat alǵan.
Osylaısha, túnnen beri Izraıldiń Lıvannyń ártúrli aımaqtaryna jasaǵan shabýyldary nátıjesinde qaza tapqandardyń jalpy sany 23 adamǵa jetkeni atap ótiledi.
Buǵan deıin Izraıl armııasy Sýr qalasynyń mańynda ornalasqan Býrdj-Kalaveı eldi mekenindegi medıtsınalyq mekemege áýe soqqysyn jasaǵany habarlady.
Lıvannyń Densaýlyq saqtaý mınıstrliginiń málimetinshe, bul shabýyl saldarynan aldyn ala derekter boıynsha 12 medıtsına qyzmetkeri qaza tapqan.
Izraıldiń Lıvanǵa shabýyldary
2 naýryz kúni Izraıl armııasy Lıvan aýmaǵynan eldiń soltústigine qaraı zymyran ushyrylǵany anyqtalǵannan keıin áýe dabyly sırenalary iske qosylǵanyn málimdedi.
Keıin Izraıl áskeri Lıvan aýmaǵyna, onyń ishinde astanasy Beırýt qalasyna áýe soqqylaryn bastaıtynyn jáne qurlyqtaǵy áskerı operatsııany keńeıtý týraly sheshim qabyldaǵanyn jarııalady.
Lıvan Densaýlyq saqtaý mınıstrliginiń derekterine sáıkes, 2 naýryzdan beri Izraıldiń shabýyldary saldarynan 773 adam qaza taýyp, 1993 adam jaralanǵan.
Aıta keteıik, Izraıldiń Lıvanǵa jasaǵan soqqysynan bes adam qaza tapty.
