Izraıldiń Lıvanǵa jasaǵan keıbir soqqylary áskerı qylmys bolýy múmkin — BUU
ASTANA.KAZINFORM - Izraıldiń Lıvandaǵy turǵyn úılerge, qonys aýdarǵan azamattarǵa jáne medıtsına qyzmetkerlerine jasaǵan áýe soqqylary halyqaralyq quqyq turǵysynan alańdaýshylyq týǵyzady jáne áskerı qylmys retinde baǵalanýy múmkin.
Bul týraly seısenbi kúni Birikken Ulttar Uıymy Adam quqyqtary jónindegi basqarmasy málimdedi.
Izraıl áskeri Lıvan aýmaǵyna soqqy berýdi Iran qoldaıtyn shııttik «Hezbolla» qozǵalysy Lıvan aýmaǵynan Izraılge zymyranmen shabýyl jasaı bastaǵannan keıin jalǵastyryp keledi. Bul áreketter AQSh pen Izraıldiń Iranǵa qarsy soǵysy aıasynda órbidi.
Lıvan bıliginiń málimetinshe, Izraıl soqqylary saldarynan keminde 886 adam qaza tapqan, 1 mıllıonnan astam adam óz úılerin tastap ketýge májbúr bolǵan.
-Izraıldiń áýe soqqylary halyq tyǵyz qonystanǵan qalalardaǵy tutas turǵyn úılerdi joıdy. Sonyń saldarynan bir otbasynyń birneshe múshesi, onyń ishinde áıelder men balalar qaza bolǵan jaǵdaılar jıi tirkeldi , — dedi Jenevada jýrnalısterge BUU Adam quqyqtary jónindegi basqarmasynyń ókili Tamın ál-Hıtan.
Izraıl áskeri bul málimdemege qatysty pikir bildirmedi. Alaıda buǵan deıin Izraıl armııasy soqqylar «Hezbolla» ınfraqurylymyna baǵyttalǵanyn habarlaǵan.
Osyǵan deıin Izraıldiń «Hezbolla» uıymynyń zymyran shabýylyna jaýap retinde Lıvanǵa birqatar soqqy jasaǵany týraly jazdyq.
