Izraıldiń Lıvandaǵy lagerge jasaǵan áýe shabýylynan 13 adam qaza tapty

ASTANA. KAZINFORM — Lıvannyń ońtústigindegi palestınalyq bosqyndar lagerine jasalǵan Izraıl áýe shabýyly saldarynan 13 adam mert boldy, dep habarlaıdy Sınhýa.

Lıvan Densaýlyq saqtaý mınıstrliginiń habarlaýynsha, Lıvannyń ońtústigindegi Saıda qalasynda ornalasqan Aın ál-Hılve bosqyndar lagerine Izraıldiń seısenbi keshkisin jasaǵan áýe shabýyly saldarynan keminde 13 adam qaza taýyp, birneshe adam jaralandy.

«Al-Manar» jergilikti telearnasynyń málimetine sáıkes, áýe soqqysy Aın ál-Hılvedegi halyq tyǵyz ornalasqan aýdanǵa jasalǵan.

Telearna habarlaǵandaı, jedel járdem kólikteri jaralanǵandardy aýrýhanalarǵa jetkizip jatqan kezde, Izraıl áskerı ushaqtary lager ústinen tómen bıiktikte ushýdy jalǵastyrǵan.

Óz kezeginde Izraıl áskeri soqqynyń HAMAS-tyń «Aın ál-Hılve aýdanyndaǵy jattyǵý bazasynda áreket etip júrgen» jaýyngerlerine baǵyttalǵanyn málimdep, bul oryn Izraıl áskerine qarsy shabýyldardy josparlaý jáne júzege asyrý úshin paıdalanylǵanyn qosyp ótti.

— Izraıl armııasy (TsAHAL) Lıvandaǵy HAMAS toptaryna qarsy áskerı operatsııa júrgizip jatyr jáne HAMAS sodyrlary qaı jerde bolsa da, olarǵa qarsy áreketti jalǵastyra beredi, — delingen málimdemede.

Budan buryn Izraıl áskeri Lıvannyń ońtústigindegi HAMAS uıymynyń oqý-jattyǵý lagerine soqqy bergenin jazǵanbyz.