Izraıldiń qarqyndy soqqylarynan keıin Gazadan 300 myńnan asa turǵyn ketti

ASTANA. KAZINFORM — Izraıl áskeriniń málimdeýinshe, sońǵy táýlik ishinde Gaza qalasynan taǵy on myńdaǵan palestınalyq ketken, dep habarlaıdy The Times of Israel. 

Osylaısha Izraıl Qorǵanys áskeriniń baǵalaýynsha, sońǵy aptalarda evakýatsııalanǵan turǵyndardyń jalpy sany 300 myńnan asty

Gaza qalasyndaǵy shaıqastar kúsheıip jatyr, al palestınalyqtar Izraıldiń qalany basyp alý josparlary aıasynda qashýyn jalǵastyryp keledi. 

Qurlyqtaǵy shabýyl aldynda evakýatsııa jarııalanǵannan keıin soltústik sektordaǵy bas qalanyń 300 myńǵa jýyq turǵyny ońtústikke qaraı bet aldy.

Jeksenbi kúni Izraıl qorǵanys kúshteri bólek evakýatsııa týraly eskertý jasaǵannan keıin Gazadaǵy tórt kópqabatty úıge soqqy jasady. Áskerılerdiń málimdeýinshe, ǵımarattardyń arasynda HAMAS qoldanyp jatqan ýnıversıtet bar. 

20 tamyzda Izraıl armııasy Gaza qalasyna basyp kirýin bastady. Operatsııaǵa «Gıdeon arbalary-2» ataýy berildi. 

Izraıl bul qalany HAMAS-tyń sońǵy bekinisteriniń biri dep ataıtynyn málimdep, rezervten 60 myń áskerdi shaqyryp, 20 myń rezervshiniń qyzmet kórsetý merzimin uzartty.

Eske sala ketsek, Izraıl Gaza qalasyna basyp kirer aldynda ony evakýatsııalaýǵa buıryq bergenin jazǵan bolatynbyz. 

Al Qatar Dohadaǵy shabýyldan keıin Gaza boıynsha kelissózdi toqtatty.