Izraıldiń Iranǵa jasaǵan shabýyldarynan 49 áıel men 13 bala qaza boldy

ASTANA. KAZINFORM — Iran memlekettik teleradıokorporatsııasynyń málimetinshe, 13 maýsymda Izraıl Iranǵa shabýyl bastaǵaly beri jalpy 627 adam mert bolǵan, dep jazady Anadoly.

Qaza tapqandardyń arasynda — 49 áıel men 13 bala bar, olardyń eń kishisi — eki aılyq náreste.

Sonymen qatar, Izraıl qarýly kúshteri eldiń ártúrli qalalarynda 7 aýrýhana men 11 jedel járdem kóligin tikeleı nysanaǵa alǵany habarlandy. Bul shabýyldardan 5 medıtsına qyzmetkeri kóz jumǵan.

Iran memlekettik telearnasy habarlaǵandaı, 13 maýsymda bastalǵan Izraıl shabýyldary kezinde toǵyz jýrnalıst opat bolǵan.

Qaza tapqan BAQ qyzmetkerleriniń qatarynda Iran Bas shtabynyń bastyǵy Mohammad Bagerıdiń qyzy — Fereshte Bagerı, Ihsan Zakırı, Álı Tehmasebı, Moın Nezerı, Ramazan Álı Chýbdarı, Emır Hosseın Tavýsı, Mohammad Djavad Elvendı, Masýme Azımı jáne Nıma Radjabpýr bar.

Masýme Azımı men Nıma Radjabpýr 16 maýsymda Izraıl áýe shabýyly kezinde Irannyń teleradıo korporatsııasy (IRIB) ǵımaratyna jasalǵan soqqy saldarynan kóz jumǵan.

Buǵan deıin Izraıldiń Qorǵanys armııasy (TsAHAL) Irannyń memlekettik telearnasynyń redaktsııasy ornalasqan ǵımaratqa soqqy jasaǵanyn jazǵanbyz.