Izraıldiń «Hezbollaǵa» jasaǵan eń iri shabýylynan 180-nen astam adam qaza tapty

ASTANA. KAZINFORM – Lıvan eliniń densaýlyq saqtaý mınıstrliginiń málimdeýinshe, dúısenbi kúni Izraıl áýe kúshteriniń Lıvandaǵy «Hezbolla» nysandaryna jasaǵan soqqylarynan 180-den astam adam mert bolyp, taǵy 700-i jaraqat aldy, dep habarlaıdy VVS. 

- Buǵan deıin el turǵyndarynyń telefondaryna Izraılden evakýatsııalaýǵa shaqyratyn aýdıo joldamalar kelgen, dep habarlady Lıvan memlekettik BAQ.

Bul Gazada bir jylǵa jýyq qaqtyǵys kezinde Izraıldiń «Hezbolla» áskerı tobyna qarsy eń keń taraǵan áýe shabýyldary tusynda boldy.

«Beırýt pen birneshe aýdandardyń azamattary ızraıldik jaýdan statsıonarlyq telefondar arqyly eskertýler alyp, tez evakýatsııalanýǵa buıryq aldy», - delingen Lıvannyń resmı ulttyq aqparat agenttiginiń (NNA) málimdemesinde.

Lıvannyń aqparat mınıstri Zıad Makarıdiń habarlaýynsha, onyń keńsesine de dál osyndaı eskertýmen qońyraý shalynǵan. Makarı buny Izraıl júrgizgen psıhologııalyq soǵystyń bóligi dep atady.

VVS-diń Beırýt qalasyndaǵy tilshisi Nafıs Konnavardtyń habarlaýynsha, dúısenbi kúni tańerteń Lıvannyń ońtústigindegi turǵyndardyń telefondaryna «Hezbolla» qarý saqtaý úshin paıdalanady dep sanalatyn turǵyn úılerden aýlaq júrýdi eskertken mátindik jáne daýystyq habarlamalar keldi.

Áleýmettik jelide taraǵan bir beınede kent turǵynyna Izraıl operatsııasy jalǵasyp jatqanyn jáne «jańa kezeńge» kirgeni aıtylǵan dybystyq habarlama kelgeni kórsetilgen.

«Eger siz «Hezbolla» paıdalanatyn kentte bolsańyz, óz qaýipsizdigińiz úshin ol jerden dereý ketińiz», - delingen dybystyq habarlamada.

Ogero memlekettik telekommýnıkatsııa kompanııasynyń basshysy Imad Kreıdıe AFP agenttigine «Lıvannyń statsıonarlyq júıesi Izraılden keletin barlyq habarlamalardy buǵattap otyrǵanyn», biraq Izraıl «dostyq eldiń halyqaralyq telefon kodyn paıdalaný arqyly baılanys júıelerin aınalyp ótip jatyr» dedi.

Ogero málimetinshe, Izraıl qyzmetteri 80 myńnan astam eskertý qońyraýyn jasaǵan.