Izraıldiń Gazaǵa shabýylynan BUU-nyń óńirlik ǵımaraty qırady
Izraıl áskeriniń Gaza sektoryna áýeden jasaǵan shabýyly saldarynan palestınalyq bosqyndarǵa kómek kórsetý jáne jumystardy uıymdastyrýǵa baǵyttalǵan BUU-nyń Taıaý Shyǵys agenttiginiń ǵımaratyna zaqym keldi. Kazinform bul týraly Anadolyǵa silteme jasap habarlaıdy.
Er-Rımal aýdanyndaǵy BUU shtab-páteri ǵımaratyna aıtarlyqtaı zalal keltirilgen, delingen agenttik málimetinde.
Gazadaǵy BUU qyzmetkerleriniń bári sol aýmaqtaǵy kórshi ǵımaratty panalaǵany atalyp ótken.
7 qazannan beri jalǵasyp jatqan Izraıldiń Gaza sektoryna shabýylynan BUU-nyń Taıaý Shyǵys agenttiginiń 2 qyzmetkeri men agenttiktiń oqý ǵımarattarynda bilim alyp jatqan Palestınanyń 5 azamaty qaza tapty.
Izraıl-Palestına qaqtyǵysy
Senbi kúni palestınalyq HAMAS toby Izraılge shabýyl jasap, el soǵys jaǵdaıyna kóshkennen keıin birqatar memleket azamattaryn Izraılden evakýatsııalaýdy uıymdastyrdy. Búgin, 10 qazanda Astana ýaqyty boıynsha saǵat 16:45-te Izraıldiń Tel-Avıv qalasynan Qazaqstanǵa repatrıatsııalyq reıs ushyp shyqty. 124 qazaqstandyq elge jetkiziletin bolady.
Keshe HAMAS Tel-Avıvtegi áýejaıǵa zymyran ushyrǵany belgili boldy. Sondaı-aq Izraıl qorǵanys mınıstri Ioav Gallant Gaza sektory tolyq oqshaýlandyrylǵanyn málim etti. Onda jaryq, tamaq jáne otyn joq.
Qazirgi ýaqytta Izraıl áskeri Gaza sektoryndaǵy HAMAS bekinisine shabýyldy jalǵastyryp jatyr. Áskerıler Palestına turǵyndaryna Mysyrǵa qashýdy usyndy.
Arab memleketteri lıgasy Gaza sektoryndaǵy jaǵdaıǵa baılanysty 11 qazanda shuǵyl jıyn ótkizetini belgili boldy. Sondaı-aq Eýropalyq odaq elderiniń Syrtqy ister mınıstrleri Izraıl – Palestına qarym-qatynasynyń ýshyǵýyna baılanysty shuǵyl jıyn ótkizetini habarlandy.
Izraıl shabýylynan qaza tapqan palestınalyqtardyń sany 770-ke deıin artty, dep habarlady seısenbi kúni Gaza densaýlyq saqtaý mınıstrligi. Mınıstrlik aqparatyna sáıkes, jaralanǵandar sany 4 myń adamǵa jetti.
Izraıldik BAQ deregi boıynsha, Gaza sektorynan jasalǵan shabýyldardan mert bolǵan Izraıl azamattarynyń sany 1 myńnan asqan.
Gazada Izraıl shabýylynan buqaralyq aqparat quraldarynyń 7 ókili kóz jumdy.
