Izraıldiń Gazadaǵy áýe soqqysynan 5 jýrnalıst qaza tapty

ASTANA. KAZINFORM – Izraıldiń Gaza sektorynyń ońtústigindegi Han-ıÝnıs qalasynda ornalasqan Naser aýrýhanasy mańyna jasaǵan áýe soqqysy saldarynan keminde 20 adam qaza tapty. Olardyń arasynda halyqaralyq BAQ-ta qyzmet atqarǵan 5 jýrnalıst bar, dep habarlaıdy BBC.

Qaza tapqandardyń qatarynda Reuters agenttiginiń operatory Hýsam ál-Masrı, Associated Press-tiń frılans-jýrnalısi Marıam Dagga, sondaı-aq Al Jazeera-da jumys istegen Mýhammed Salame, fotograf Mýath Abý Taha jáne Ahmad Abý Azız bar.

AP redaktsııasy 33 jastaǵy Marıam Dagganyń ólimine baılanysty ujymnyń qaraly kúıde ekenin bildirdi. NBC arnasy bastapqy málimetterge qaramastan, Mýath Abý Tahanyń óz qyzmetkeri bolmaǵanyn naqtylady.

Gaza azamattyq qorǵanys qyzmetiniń habarlaýynsha, alǵashqy soqqy kezinde birneshe adam kóz jumsa, ekinshi soqqy qutqarýshylar oqıǵa ornyna jetken kezde jasalǵan.

Izraıl armııasy (TsAHAL) shabýyldy rastady. Áskerılerdiń málimdemesinde: «TsAHAL jýrnalısterdi nysanaǵa almaıdy jáne beıbit turǵyndarǵa keletin zalaldy barynsha azaıtýǵa tyrysady. Áskerılerdiń qaýipsizdigin qamtamasyz etý úshin osyndaı sharalar qabyldandy», – delingen.

Oqıǵa ornyndaǵy vıdeokadrlarda aýrýhana kireberisinde dárigerlerdiń qanǵa boıalǵan kıimdi kórsetip turǵan sátinde jańa jarylys bolǵany kórinedi. Adamdar dúrbeleńge túsip, qasha bastaıdy, áınekter synǵany ańǵarylady. Basqa beınelerde aýrýhana ǵımaratynan qoıý tútin kóterilip jatqany, syrtta adamdardyń aıqaılap, júgirip júrgeni baıqalady.

Bul oqıǵa Izraıldiń eki apta buryn Gaza qalasyndaǵy «Ásh-Shıfa» aýrýhanasy mańynda 6 jýrnalıst qaza tapqan soqqysynan keıin bolyp otyr. Sol kezde qaza tapqandardyń tórteýi Al Jazeera qyzmetkerleri edi. Izraıl tarapy olardyń biri – tilshi Anas ash-Sharıfti HAMAS toby jetekshileriniń biri dep ataǵan, biraq Jýrnalısterdiń quqyn qorǵaý komıteti (CPJ) bul aıyptaýlardy dálelsiz dep málimdedi.

BUU Adam quqyqtary jónindegi Joǵarǵy komıssary basqarmasy da shabýyldy aıyptap, ony halyqaralyq quqyqtyń óreskel buzylýy dep atady.

Sońǵy oqıǵalardan keıin 2023 jylǵy qazan aıynda bastalǵan soǵystan beri Gazada qaza tapqan jýrnalısterdiń sany 200-ge jýyqtady.