Izraıldiń Gaza sektoryndaǵy mektepke jasaǵan soqqysynan 18 adam, onyń ishinde 6 BUU qyzmetkeri qaza tapty
ASTANA. KAZINFORM – Sársenbi kúni Gaza sektorynyń ortalyq bóligindegi Nýseırat bosqyndar lagerindegi myńdaǵan palestınalyqtar baspana retinde paıdalanatyn mektepke shabýyl jasalyp, 18 adam, onyń ishinde Birikken Ulttar Uıymynyń Taıaý Shyǵystaǵy palestınalyq bosqyndar jónindegi agenttiginiń alty qyzmetkeri qaza tapty, dep jazady AlJazeera.
Soqqy Nýseırat bosqyndar lagerindegi Ál-Jaýnı mektebine jasalǵan. Kýágerlerdiń aıtýynsha, qaza tapqandar arasynda lagerde jasyrynǵan palestınalyq áıelder men balalar da bar. Sondaı-aq BUU-nyń Taıaý Shyǵystaǵy palestınalyq bosqyndarǵa kómek kórsetý jónindegi agenttiginiń (BAPOR) alty qyzmetkeri, sonyń ishinde BAPOR-dyń baspana menedjeri men qonys aýdarǵandarǵa kómektesetin toptyń basqa músheleri de qaza tapty.
— Bul oqıǵa bizdiń qyzmetkerler eń kóp qaza tapqan soqqy boldy, — dep habarlady BAPOR.
BUU agenttiginiń málimetinshe, soǵys bastalǵaly atalmysh mektepke 5 ret shabýyl jasalǵan. Ony 12 myńǵa jýyq bosqyn, ásirese balalar men áıelder panalady.
BAPOR qaqtyǵysqa qatysýshy barlyq taraptardy eshqashan mektepterdi nemese olardyń mańyndaǵy aýmaqtardy áskerı nemese jaýyngerlik maqsatta paıdalanbaýǵa shaqyrdy. Málimdemede mektepter men basqa da azamattyq ınfraqurylymdar árqashan qorǵalýy kerek jáne nysana emes ekeni atap kórsetildi.
— Gazada eshkim qaýipsiz emes. Eshkimdi aıamaıdy, — delingen H áleýmettik jelisindegi BAPOR málimdemesinde.
Izraıl qorǵanys kúshteri mektep aýmaǵynda komandalyq ortalyq qurǵan jáne sol jerden shabýyldar josparlaǵan HAMAS sodyrlaryn nysanaǵa alǵanyn aıtyp, beıbit turǵyndardy qorǵaý úshin sharalar qabyldaǵanyn habarlady.
— Beıbit turǵyndarǵa zııan keltirý qaýpin azaıtý úshin kóptegen sharalar qabyldandy, sonyń ishinde joǵary dáldiktegi oq-dárilerdi paıdalaný, áýe baqylaýy jáne qosymsha barlaý, — dedi Izraıl qorǵanys kúshteri.
Izraıl áskerıleri HAMAS-ty palestınalyq beıbit turǵyndardy tiri qalqan retinde paıdalandy dep aıyptaıdy, al HAMAS ony joqqa shyǵarady.
BUU Bas hatshysy Antonıý Gýterrısh mektepke jasalǵan shabýyldy halyqaralyq gýmanıtarlyq quqyqty óreskel buzý dep atap, olardy dereý toqtatýdy talap etti.
— Gazada bolyp jatqan jaǵdaı múlde aqylǵa qonymsyz, — dedi Gýterrısh.
BUU ókili Stefan Dıýjarrık bul Gazadaǵy soǵys bastalǵannan bergi Gazanyń ortalyǵyndaǵy Nýseırat bosqyndar lagerindegi bir mektepke jasalǵan besinshi áýe shabýyly ekenin aıtty.
— Biz beıbit turǵyndarǵa, sondaı-aq BUU nysandaryna baǵyttalǵan barlyq áýe shabýyldaryn aıyptaımyz, — dedi Dıýjarrık.
Gaza sektoryndaǵy soǵys 2023 jyly 7 qazanda HAMAS Izraılge shabýyl jasap, Izraıldiń baǵalaýy boıynsha 1200 adamdy óltirip, 250-ge jýyq adamdy kepilge alǵan kezde bastaldy. Izraıldiń Gaza sektoryna jasaǵan keıingi shabýyly anklavtyń densaýlyq saqtaý mınıstrliginiń málimetinshe, 41 000-nan astam palestınalyqtardyń ómirin qıdy.
