Izraıldiń Gaza sektoryna jasaǵan soqqysynan BUU-nyń bir qyzmetkeri kóz jumdy
ASTANA. KAZINFORM – Izraıldiń Gazaǵa jasaǵan soqqysynan BUU demeýshilik etetin uıymnyń bir qyzmetkeri qaza taýyp, beseýi jaralandy. Bul týraly Palestına anklavynyń densaýlyq saqtaý mınıstrligi habarlady, dep jazady TASS.
– BUU-ǵa qarasty uıymdarda jumys istegen 6 sheteldik azamat Gazanyń ortalyǵyndaǵy áýe shabýyly kezinde jaraqat aldy. Olardyń biri Shýhada ál-Aqsa aýrýhanasyna jetkennen keıin kóz jumdy, - dep jazady Gaza Densaýlyq saqtaý mınıstrligi Telegram arnasynda.
Dárigerler jaraqat alǵandardyń jaǵdaıy aýyr ekenin aıtty.
Óz kezeginde mysyrlyq «Ál-Kahıra ál-Ihbarııa» telearnasy derekkózderge silteme jasap, oq jaýǵan BUU qyzmetkerleri Gaza sektoryn mınalardan tazartýmen aınalysqanyn málimdegen. Oqıǵa anklavtyń ortalyq bóligindegi Deır-el-Balah qalasynyń aımaǵynda boldy.
18 naýryzda Izraıl qorǵanys kúshteri Gaza sektoryndaǵy HAMAS nysandaryna jappaı soqqy berdi.
Netanıahý budan bylaı HAMAS-pen kelissózder tek oq astynda júrgiziletinin málimdegen.
Aıta keteıik, Izraıldiń Gazadaǵy shabýyldarynan qaza tapqandar sany 48 543-ke jetti.