Izraıldiń Gaza sektoryna jasaǵan soqqysynan 22 palestınalyq qaza tapty
ASTANA. KAZINFORM — Izraıl áýe kúshteriniń Gaza sektoryndaǵy úıler men kólikterge jasaǵan soqqysynan 22 palestınalyq qaza tapty, dep habarlaıdy ANEWZ.
Azamattyq qorǵanystyń habarlaýynsha, 10 qazannan beri atysty toqtatý kelisimin buzǵan birneshe shabýylda qaza tapqandar arasynda áıelder men balalar da bar.
Gaza Azamattyq qorǵanysynyń ókili Mahmýd Bassal zardap shekkender arasynda áıelder, balalar men qarttardyń bar ekenin jáne keıbir shabýyldardan búkil ǵımarattardyń qıraǵanyn aıtty.
— Izraıldiń ushqyshsyz ushaǵy Gaza qalasynyń batysyndaǵy Abbas qıylysy mańynda azamattyq kólikke soǵýy saldarynan 5 adam qaza taýyp, birneshe adam jaralandy, — dedi Bassal.
Dál osy qalada Al-Labbabıdı kóshesindegi úıge jasalǵan áýe shabýylynda 4 palestınalyq mert boldy. Taǵy ekeýi Deır-el-Balahtyń batysyndaǵy Bılal bın Rabah meshitiniń janynda, úsheýi Nýseırat bosqyndar lagerindegi Al-Avda aýrýhanasynyń janyndaǵy úıge jasalǵan áýe shabýylynan qaza tapty. Turǵyn úıge jasalǵan áýe shabýylynan keıin Nýseırattaǵy lagerde de 7 palestınalyq kóz jumdy.
Sondaı-aq Izraıl kúshteri Gaza sektorynyń El-Býreıdj aımaǵynda jáne soltústigindegi Djabalııada oq jaýdyryp, úsh palestınalyqty jaralady, dep habarlady dárigerler. Izraıl armııasy sary syzyqty kesip ótken qarýly adamdy «joıdym» dep málimdedi.
Tań atqanda Izraıl kúshteri shyǵystaǵy Rafah, Han ıÝnıs, El-Býreıdja, Deır-el-Balah aýdandary men Gazanyń shyǵysyndaǵy aýdandarǵa, sonyń ishinde Týffa men Shýdjaııýǵa qosymsha soqqy berdi.
Kýágerlerdiń aıtýynsha, áskerler Izraıl baqylaýyndaǵy aýdandarda bomba ornatylǵan kólikterdi jaryp, turǵyn úılerge shabýyl jasaǵan.
2023 jyldyń qazan aıynan beri Izraıldiń Gaza sektoryndaǵy operatsııalary 70 000-ǵa jýyq adamdy mert qyldy. Olardyń deni áıelder men balalar. Sonymen qatar 170 800-den astam adam jaralandy. Oǵan qosa, anklavtyń úlken bóligin qırandyǵa aınaldyrdy. 10 qazanda jarııalanǵan atysty toqtatý kelisimi keń aýqymdy shabýyldardy ýaqytsha toqtatty. Biraq sońǵy shabýyldar sary syzyqta jáne onyń aınalasyndaǵy shaıqastardyń qaıta jandanǵanyn kórsetedi.
Aıta keteıik, Izraıl Lıvannyń ońtústigi men shyǵysynda «Hezbolla» bazalaryna soqqy jasady.