Izraıldiń Gaza sektoryna jasaǵan shabýylynan qaza tapqandar sany 62 895 adamǵa jetti
ASTANA. KAZINFORM – 2023 jyldyń 7 qazanynan beri Izraıl áskeriniń Gaza sektoryna jasaǵan shabýyldarynan qaza tapqan palestınalyqtardyń sany 62 895 adamǵa jetti. Tek keıingi táýliktiń ózinde eksklavta 76 adam Izraıl shabýyldarynyń qurbany boldy, dep habarlaıdy Anadoly aqparat agenttigi.
Palestına Densaýlyq saqtaý mınıstrliginiń Izraıldiń aımaqta jalǵasyp jatqan shabýyldarynan kóz jumǵandar men jaraqat alǵandar týraly sońǵy málimetter usynylǵan aqparat boıynsha, keıingi 24 saǵatta Gaza sektoryndaǵy aýrýhanalarǵa qaza bolǵan 76 adam jáne jaralanǵan 298 adam jetkizildi.
Izraıl áskeriniń 19 qańtarda kúshine engen atysty toqtatý kelisimi buzylǵan soń 18 naýryzdan beri jasaǵan shabýyldarynan opat bolǵandar sany 10 050, jaraqat alǵandar qatary 46 886 adamǵa jetti.
Habarlanǵandaı, keıingi táýlikte kómek alýǵa árekettengen 18 palestınalyq qaza taýyp, 106 adam túrli dene jaraqatyn alǵan.
Izraıl men AQSh basshylyǵy qurǵan kómek taratý ortalyqtary dep atalatyn aımaqtarda 27 mamyrdan beri júıeli túrde Izraıl shabýyldarynan ajal qushqandar sany 2 158 adamǵa, jaralanǵandar sany 15 843 adamǵa jetti.
2023 jyldyń 7 qazanynan beri Izraıldiń Gaza sektoryna jasaǵan shabýyldarynan qaza tapqan palestınalyqtardyń jalpy sany 62 895 adamǵa, jaraqat alǵandar sany 158 927 adamǵa jetti.
Keıingi táýlikte Gazadaǵy aýrýhanalarda durys tamaqtanbaý men ashtyqtan 10 adam qaıtys boldy, olardyń arasynda balalar da bar. Osylaısha, ashtyqtan qaıtys bolǵandar sany 313 adamǵa jetti, onyń ishinde 119-y – balalar.
Atap ótkenimizdeı, Gaza sektorynda myńdaǵan qurbannyń denesi áli de úıindi astynda qalyp otyr.
Buǵan deıin Izraıldiń Gazadaǵy áýe soqqysynan 5 jýrnalıst qaza tapqanyn jazǵan bolatynbyz.