Izraıldiń Gaza qalasyn okkýpatsııalaý týraly jospary maquldandy

ASTANA. KAZINFORM – Izraıldiń qaýipsizdik kabıneti jumaǵa qaraǵan túni premer-mınıstr Bınıamın Netanıahýdyń Gaza qalasyn baqylaýǵa alý týraly sheshimin bekitti, dep habarlaıdy VVS.

Bul Netanıahý jaqynda ǵana málimdegen anklavtyń barlyq aýmaǵyn okkýpatsııalaýǵa qatysty jospardyń birinshi kezeńi bolady.

Qaýipsizdik kabıneti májilisiniń aldynda premer Fox News telearnasyna Gaza sektoryn ýaqytsha tolyq baqylaýǵa alýǵa nıetti ekenin aıtqan.

Izraıl áskeri osy ýaqytta Gazanyń 75 paıyz aýmaǵyn baqylap otyr. Izraıldikterdiń basym kópshiligi jańa jospardyń kózdegen maqsatqa jetýge, ıaǵnı HAMAS-ty túbegeıli joıyp jiberýge múmkindik beretinine kúmánmen qaraıdy. Sondaı-aq olar kepildikte qalǵan tiri adamdardyń ómirine qaýip týýy múmkin dep esepteıdi.

Times of Israel basylymynyń jazýynsha, Gaza qalasynda júrgiziletin operatsııa aýmaqta jappaı evakýatsııalaýdy qajet etedi. Al ol jerde qazir 800-ge jýyq adam turyp jatyr.

- Izraıldiń qorǵanys armııasy áskerı áreketter júrip jatqan jerden basqa aýmaqta gýmanıtarlyq kómekti júzege asyra otyryp, Gaza qalasyna baqylaý ornatýǵa tyrysatyn bolady, - delingen Netanıahý keńsesiniń qaýipsizdik kabınetiniń qorytyndysy boıynsha jasaǵan málimdemesinde.

Málimdemede sonymen qatar «soǵysty toqtatý» týraly ustanymdar kórsetilgen.

Olar:

HAMAS-ty qarýsyzdandyrý;

Kepildiktegi barlyq adamdardy qaıtarý (ólgenderin de tirilerin de);

Gaza sektoryn demılıtarııazatsııalaý;

HAMAS-qa da Palestına avtonomııasyna da qatysy joq balamaly úkimet qurý;

CNN telearnasyna bergen suhbatynda Netanıahý sektordy basqarý ýaqytsha ákimshilikke beriletinin aıtty.

Aıta keteıik, osyǵan deıin BUU Izraıldi Gazany tolyq okkýpatsııalaýdy toqtatýǵa shaqyrǵan bolatyn.