Izraıldiń birneshe qalasynda Netanıahý úkimetiniń ketýin talap etken mıtıng ótti
ASTANA. KAZINFORM – 18 sáýir keshinde Izraıldiń birqatar qalasynda úkimetke qarsy mıtıngiler ótti. Narazylyqqa shyqqandar merziminen buryn saılaý ótkizýdi talap etti, dep habarlaıdy ızraıldik N12 telearnasy.
Telearnasynyń málimetine súıensek, Tel-Avıv, Haıfa jáne Ierýsalım qalalarynda ótken aktsııalarǵa júzdegen adam jınalǵan.
– Ierýsalım okrýginiń polıtseıleri Ierýsalımdegi Parıj alańynda ótken manıfestatsııa barysynda qoǵamdyq tártipti saqtaý úshin jumyldyryldy. Órt tutatty degen kúdikpen bir adam ustaldy, – delingen polıtsııanyń baspasóz qyzmeti taratqan málimdemede.
N12 telearnasynyń habarlaýynsha, Tel-Avıvtegi narazylyq aktsııasyna qatysýshylar qazirgi úkimettiń otstavkaǵa ketýin talap etken. Al Ierýsalım men Haıfadaǵy sherýshiler Izraılde merziminen buryn saılaý ótkizýdi talap etti.
Eske sala ketsek, Birqatar el EO-ny Izraılmen qaýymdastyq týraly kelisim jasaýdy toqtata turýǵa shaqyrdy. Ispanııa, Slovenııa jáne Irlandııanyń Syrtqy ister mınıstrleri EO-nyń syrtqy saıasat jónindegi basshysy Kaıa Kallasqa birlesken hat joldap, Taıaý Shyǵystaǵy, ásirese Lıvandaǵy ahýalǵa baılanysty odaqtyń ustanymyn shuǵyl qaıta qaraýdy jáne naqty sharalar qabyldaýdy talap etti.
