Izraıldiń Beırýtke jasaǵan soqqysynan tórt adam qaza tapty
ASTANA. KAZINFORM — Beırýttyń ońtústik shetine jasalǵan Izraıl áýe shabýylynan qaza tapqandar sany tórt adamǵa jetti. Onyń ekeýi tórt jáne alty jastaǵy balalar. Bul týraly eldiń Densaýlyq saqtaý mınıstrligi habarlady. Buǵan deıin bir áıel qaıtys bolǵany habarlanǵan bolatyn, dep jazady TASS.
Al Mayadeen telearnasynyń habarlaýynsha, úıindi astynda qalyp qoıǵandar men iz-túzsiz joǵalǵandardy izdeý úshin aýyr tehnıka jumyldyryldy.
Zardap shekkender sany 68-den 74 adamǵa deıin ósti, olardyń barlyǵy qalalyq aýrýhanalarda em alyp jatyr. 65 adam úılerine shyǵaryldy, qalǵandarynyń jaǵdaıy hırýrgııalyq emdi qajet etedi. Shııt Hezbolla jasaqtarynyń shtab-páteri ornalasqan Haret-Horeık kóshesindegi úıindilerdi joıý jumystary jalǵasyp jatyr. Kýágerler qaza bolǵandar sany áli de artýy múmkin ekenin aıtady.
30 shilde kúni Izraıl áskerı-áýe kúshteriniń joıǵysh ushaǵy Hezbolla bekinisi retinde qyzmet etetin Beırýttyń ońtústik shetindegi Dahııa qalasyna tórt zymyran ushyrdy. Zymyran qulaǵan blokta tórt qabatty ǵımarat qırap, kórshiles ǵımarattar men turaqtaǵy kólikterge zaqym keldi.
Shabýyldyń maqsaty — «Hezbollanyń» jedel shtabyn basqarǵan áskerı jetekshisi Fýad Shokrdy joıý. Alǵan jaraqatynyń saldarynan ol aýrýhanada qaıtys boldy, biraq bastapqyda ol qastandyqtan qutylyp ketti dep habarlanǵan bolatyn.
