Izraıldiń Lıvan astanasy Beırýtqa jasaǵan áýe soqqysynan 5 adam qaza tapty
ASTANA. KAZINFORM — Izraıl áýe kúshteriniń Lıvan astanasy Beırýttaǵy Dahııe aýdanyna jasaǵan soqqysy saldarynan bes adam qaza taýyp, taǵy 28 adam jaralandy. Bul týraly Anadolý agenttigi jazdy.
Izraıl áskeriniń ókili Avıhaı Adraı amerıkalyq X áleýmettik jelisinde Izraıl Áýe kúshteri Dahııe aýdanyna shabýyl jasaǵanyn málimdedi. Onyń aıtýynsha, soqqynyń nysanasy «Hezbolla» uıymynyń joǵary laýazymdy ókilderiniń biri bolǵan.
Lıvannyń memlekettik NNA aqparat agenttigi Dahııege jasalǵan soqqylar saldarynan kóptegen adamnyń jaraqat alǵanyn jáne aıtarlyqtaı materıaldyq shyǵyn keltirilgenin habarlady.
Lıvan Densaýlyq saqtaý mınıstrligi qaza tapqandar týraly habarlady
Lıvan Densaýlyq saqtaý mınıstrliginiń málimdemesine sáıkes, aldyn ala derekter boıynsha shabýyl saldarynan 5 adam qaza taýyp, taǵy 28 adam jaralanǵan.
Sondaı-aq shabýyldan keıin Beırýt aspanynda tómen bıiktikte ushqyshsyz ushý apparattarynyń ushýy jalǵasyp jatqany baıqalǵan.
Izraıl premer-mınıstriniń keńsesi Beırýtqa jasalǵan soqqynyń maqsaty «Hezbollanyń» áskerı qanatynyń kóshbasshysy dep sanalatyn adam bolǵanyn málimdedi.
Aqparatqa sáıkes, premer-mınıstr Bınıamın Netanıahý Bas shtab bastyǵy Eıal Zamırmen jáne qorǵanys mınıstri Israel Katspen keńeskennen keıin shabýyl jasaýǵa buıryq bergen.
Izraıldik BAQ-tyń málimetinshe, shabýyl nysanasy AQSh-tyń sanktsııalyq tizimine engizilgen «Hezbollanyń» joǵary laýazymdy múshesi Heısem Alı Tabatabaı bolǵan.
Izraıl qorǵanys mınıstri Israel Kats Izraıl óziniń qaýipsizdigine qater dep eseptegen kez kelgen áreketke qatań jaýap beretinin málimdedi.
Ol sondaı-aq atysty toqtatý rejımine qaramastan, «Izraılge jáne onyń azamattaryna tóngen qaýiptiń aldyn alý» syltaýymen Lıvanǵa jasalatyn shabýyldardyń jalǵasatynyn aıtty.
Izraıl shabýyl aldynda AQSh-ty habardar etken
Izraıldiń memlekettik KAN telearnasy Tel-Avıv basshylyǵy Beırýtqa soqqy jasamas buryn AQSh-ty aldyn ala habardar etkenin jetkizdi.
Yedioth Ahronot gazeti keltirgen Izraıldik derekkózdiń aıtýynsha, Beırýttaǵy Dahııe aýdanyna shabýyl jasalǵan kezde «Hezbolla» tarapynan bolýy múmkin jaýap kútilgen, alaıda buǵan daıyn bolǵan.
Atysty toqtatý rejımine qaramastan Izraıl shabýylyn jalǵastyryp otyr
Izraıl 2023 jyldyń qazan aıynda Lıvanǵa shabýyldaryn bastaǵan, al 2024 jyldyń qyrkúıeginde qaqtyǵystar tolyq aýqymdy soǵysqa ulasqan. Áskerı qımyldar barysynda 4 myńnan astam adam qaza taýyp, shamamen 17 myń adam jaralanǵan.
Ótken jyldyń 27 qarashasynda Lıvan men Izraıl arasynda atysty toqtatý týraly kelisimge qol jetkizilgenine qaramastan, Izraıl bul rejımdi birneshe ret buzdy.
Izraıl 2023 jyldyń 8 qazanynan keıin basyp alǵan bes bıiktikti ustap otyr, sondaı-aq ondaǵan jyldar boıy baqylaýynda bolǵan birqatar aýdandarda áskerı qatysýyn saqtaýda.
Lıvan Densaýlyq saqtaý mınıstrliginiń málimetinshe, byltyr 27 qarasha men osy jylǵy 20 qarasha aralyǵynda Izraıldiń atysty toqtatý rejımin buza otyryp jasaǵan soqqylary saldarynan 331 adam qaza taýyp, 945 adam jaralanǵan.
Aıta keteıik, buǵan deıin Izraıl Beırýttyń aýdandarynyń birine soqqy jasaǵanyn habarlaǵanbyz.
Sondaı-aq Izraıldiń Gaza sektoryna jasaǵan soqqysynan 22 palestınalyq qaza tapty.