Izraıldiń áýeden jasaǵan soqqysynan Gaza sektory ortalyǵynda 70 adam qaza tapty

HAMAS qozǵalysy basqaratyn Gaza densaýlyq saqtaý mınıstrligi jeksenbi kúni sektordyń ortalyq bóligindegi ál-Magazı bosqyndar lagerine Izraıl soqqy jasap, 70 adam qaza tapqanyn málim etti, dep habarlaıdy Kazinform menshikti tilshisi.

Mınıstrlik ókili Ashraf Al-Kýdra osy aýdanda turatyn adamdar sanyn eskere otyryp, qaza bolǵandar sany ósýi múmkin dep boljady.

«Al-Magazı bosqyndar lagerine áýeden soqqy jasalǵannan keıin ál-Aqsa aýrýhanasyna ondaǵan adamnyń máıiti jetkizildi», — dep habarlaıdy AlJazeera.

Juma kúni BUU Qaýipsizdik Keńesiniń Gazaǵa kómek kólemin arttyrý týraly rezolıýtsııasy qabyldanǵannan keıin áýeden jasalǵan soqqy sany artty. Ony jergilikti turǵyndar men palestınalyq BAQ rastap otyr.

Gaza densaýlyq saqtaý mınıstrligi Ashrafa Al-Kýdranyń sózinshe, soqqy saldarynan halyq tyǵyz ornalasqan kvartaldyń tas-talqany shyqqan.

Aýrýhananyń aldyn ala derekteri boıynsha, qaza tapqan 68 adamnyń qatarynda 12 áıel men jeti bala bar.

Palestınalyq Qyzyl aı qoǵamy dereginshe, jedel járdem brıgadasy men qutqarýshylar negizgi joldar joıylǵandyqtan kedergilerge tap bolǵan, tıis oryndarǵa jete almaı jatyr.
Izraıl áskeri Magazıdegi oqıǵa týraly aqparatty qarastyryp, beıbit turǵyndarǵa múmkindiginshe zalal keltirmeýge tyrysatynyn málim etti.

«Gazadaǵy HAMAS lańkesteri týdyrǵan máselelerge qaramastan, TsAHAL halyqaralyq quqyqty, onyń ishinde beıbit turǵyndarǵa tıetin zııandy azaıtý jolyn ustanady», — dep málimdedi Izraıl qorǵanys áskeri.

TsAHAL Al-Magazıge jasalǵan shabýyldy tergep jatqanyn habarlady.

Soǵys bastalǵaly Izraıl HAMAS-ty óz beıbit turǵyndardyń ólimine kinálap keledi. Olardyń pikirinshe, palestınalyq top áskerı ınfraqurylymyn azamattar turatyn aýdandarǵa salyp tastaǵan.

Associated Press agenttigi HAMAS densaýlyq saqtaý organdary keıinirek qaza bolǵandar sany 70 emes, 68 ekenin aıtty dep jazdy.

Dúısenbige qaraǵan túni Izraıl ÁÁK Gaza sektorynyń ortalyq bóligine taǵy shabýyl uıymdastyrdy. Soqqylar al-Magazı jáne Býreıdj bosqyndar lagerine baǵyttalyp, qurbandar sany artty. Keıingi 12 saǵatta júzdegen adam óltirilgeni habarlandy. Olardyń basym bóligi — áıelder men balalar.

7 qazannan beri Izraıl shabýyly saldarynan 20 400-den astam palestınalyq mert boldy. 7 qazandaǵy HAMAS soqqysynan 1139 Izraıl azamaty qaza tapty.

BUU habarlaýynsha, Gaza sektorynda eki mıllıonǵa jýyq adam azyq-túlik pen sý jetispeýinen zardap shegip otyr. Baǵalaý boıynsha, sý qorynyń 96%-i adam tutynýǵa jaramsyz. Alǵashqy qajettilik zattary, onyń ishinde aýyz sý men dári-dármek jetispeı jatyr.

Buǵan deıin Izraıl bıligi Gaza sektorynyń ońtústigindegi halyqty dereý kóshirýge buıyrǵany habarlanǵan bolatyn.

Sondaı-aq Izraıldiń Gaza sektoryna soqqylary saldarynan 7 qazannan beri 20 258 adam mert boldy, taǵy 53 688-i jaraqat alǵanyn jazǵan edik.