Izraıldiń áýe soqqysy saldarynan Lıvannyń shyǵysynda keminde 10 adam qaza tapty
ASTANA. KAZINFORM — Izraıl áskerı-áýe kúshteriniń Lıvannyń shyǵysyndaǵy Baalbek qalasyna jaqyn ornalasqan Rııak eldi mekenine jasaǵan áýe soqqysy saldarynan, aldyn ala málimet boıynsha, keminde 10 adam qaza taýyp, taǵy 30 adam jaraqat aldy. Bul týraly Anadolý jazdy.
Lıvannyń National News Agency (NNA) aqparat agenttiginiń habarlaýynsha, ızraıldik joıǵysh ushaqtar Baalbek mańyndaǵy Qasr-Naba jáne Tamnın át-Tahta eldi mekenderiniń jazyq aımaqtaryna eki ret soqqy jasaǵan.
Agenttik málimetinshe, Rııak eldi mekeninde áýe soqqysy saldarynan tas jol boıynda ornalasqan, «Ál-Kard ál-Hasan» qarjy mekemesiniń janyndaǵy ǵımarat tolyqtaı qıraǵan. Bul mekeme Hezbolla qozǵalysyna jaqyn dep sanalady.
Sol derekkózge sáıkes, Izraıl avıatsııasy Lıvannyń shyǵysyndaǵy taýlar eteginde ornalasqan Mahallıa ash-Shara aýdanyna da úsh ret soqqy jasaǵan.
Rııak eldi mekenindegi ǵımaratqa jasalǵan shabýyl saldarynan keminde 10 adam qaza taýyp, taǵy 30 adam jaralanǵan.
Óz kezeginde Izraıl armııasy Baalbek aýdanyndaǵy soqqynyń nysanasy «Hezbollaǵa» tıesili jáne onyń músheleri Izraıl men Izraıl armııasyna qarsy áreketterdi josparlaý úshin paıdalanǵan «shtab» bolǵanyn málimdedi.
Buǵan deıin keshke Izraıl áskerı-áýe kúshteri Lıvannyń ońtústigindegi Saıda qalasyna jaqyn ornalasqan Aın ál-Hılva palestınalyq bosqyndar lagerine de soqqy jasaǵan. Osy shabýyl saldarynan 2 adam qaza taýyp, taǵy úsheýi jaraqat alǵan.
Sondaı-aq Izraıl avıatsııasy Lıvannyń ońtústigindegi Ansar men Zararııa eldi mekenderiniń arasyndaǵy aýmaqqa, sondaı-aq Serıre men Barýz eldi mekenderi mańyndaǵy Lıtanı ózeniniń arnasyna birneshe soqqy jasady.