Izraıldiń áskerı ushaqtary Lıvannyń ońtústigine áýe soqqylaryn jasady

ASTANA. KAZINFORM — Izraıl avıatsııasy Lıvannyń ońtústigindegi Ansar men Zararııa eldi mekenderiniń arasyndaǵy aýmaqqa, sondaı-aq Serıre men Barýz eldi mekenderi mańyndaǵy Lıtanı ózeniniń arnasyna soqqylar jasady, dep habarlaıdy Anadoly.

Lıvannyń memlekettik aqparat agenttigi NNA-nyń habarlaýynsha, budan bólek, Izraıldiń áskerı ushaqtary Basalııa, Kafr-Malkı jáne Mahmýdııa eldi mekenderin, sondaı-aq Lýveıza eldi mekeniniń mańyndaǵy Shetta ózeniniń arnasyn da shabýyldaǵan.

Áleýmettik jelilerde jarııalanǵan beınejazbalar men fotosýretterde soqqy jasalǵan aımaqtar ústinen qalyń tútinniń kóterilgeni kórinedi.

Lıvan bıligi ázirge atalǵan shabýyldarǵa qatysty resmı túsinikteme bergen joq, sondaı-aq qurbandar týraly aqparat ta jarııalanbady.

Izraıl armııasynyń baspasóz qyzmeti Lıvannyń ońtústigindegi túrli aýdandarda «Hezbollaǵa» tıesili dep boljanatyn nysandardyń joıylǵanyn málimdedi.

Soqqy jasalǵan nysandardyń qatarynda «Hezbollanyń» jattyǵý lagerleri, qarý saqtaýǵa paıdalanylǵan delinetin jerasty týnnelderi, zymyran ushyrý alańdary jáne basqa da áskerı obektiler ataldy.

Izraıl «Hezbollany» atysty toqtatý rejımin buzdy dep aıyptap, shabýyldardyń jalǵasatynyn eskertti.

Kazinform agenttiginiń menshikti tilshisiniń habarlaýynsha, Lıvan baǵyty boıynsha jaǵdaıdyń ýshyǵýy odan ári eskalatsııaǵa jol bermeý áreketteri aıasynda qatań saıası málimdemelermen qatar júrip otyr.

Buǵan deıin Lıvan prezıdenti Djozef Aýn seısenbi kúni Izraıldiń eldiń ońtústigi men shyǵysyndaǵy birqatar eldi mekenderge, sondaı-aq Saıda qalasyna jasaǵan áýe soqqylaryn aıyptaǵan bolatyn.

Onyń aıtýynsha, bul áreketter jaǵdaıdyń ýshyǵýyna jol bermeýge baǵyttalǵan kúsh-jigerdi álsiretedi.