Izraıldik qonystanýshylar frantsýz meri men dıplomattarǵa shabýyl jasady
ASTANA. KAZINFORM — Izraıldik qonystanýshylar Iordan ózeniniń batys jaǵalaýyndaǵy Palestına aýmaqtaryna saparmen kelgen eýropalyq dıplomattardyń kólik kolonnasyna shabýyl jasap, Frantsııanyń 78 jastaǵy merin soqqyǵa jyqty, dep habarlaıdy DW.
Bul týraly senbi, 17 qazanda AFP agenttigi oqıǵa kýágerleri men dıplomattardyń ózderine silteme jasap habarlady.
Betperde kıgen qonystanýshylar Iordan ózeniniń batys jaǵalaýyndaǵy basym bóligi hrıstıandar turatyn Palestına aýylynda Frantsııa, Belgııa jáne Polsha ókilderi otyrǵan kólikterge shabýyl jasaǵan. Dıplomattar bul jerge, sonyń ishinde qonystanýshylardyń jergilikti turǵyndarǵa shabýyl jasaýyna jol bermeý maqsatynda barǵan.
AFP málimetinshe, qonystanýshylar Frantsııanyń soltústigindegi Olnýa-Emerı qalasynyń 78 jastaǵy meri Bernar Bodýǵa da shabýyl jasaǵan. Ol jaraqat alǵanymen, aýrýhanaǵa jatqyzýdy qajet etpegen. Belgııanyń syrtqy ister mınıstri Maksım Prevo áleýmettik jelidegi «H» paraqshasynda shabýyl kezinde frantsýz dıplomatynyń zardap shekkenin, sondaı-aq Belgııa delegatsııasynyń kóligine zaqym kelgenin habarlady.
Izraıl bıligi eýropalyq dıplomattarǵa jasalǵan shabýyldy aıyptady. Atap aıtqanda, eldiń syrtqy ister mınıstri Gıdeon Saar bul oqıǵany ızraıldik qonystanýshylar tarapynan jasalǵan «aýyr zorlyq-zombylyq áreketi» dep atady.
Bir kún buryn qonystanýshylar «Vashıngton post» gazetiniń jýrnalısine shabýyl jasaǵan.
Eýropalyq dıplomattarǵa jasalǵan shabýyl Izraıldegi saılaý naýqanynyń sońǵy kúnderinde boldy. Qazirgi premer-mınıstr Bınıamın Netanıahý Iordan ózeniniń batys jaǵalaýyndaǵy qonystar turǵyndarynyń daýysyna úmit artyp otyr. Bul qonystar dep Izraıl azamattary eldiń halyqaralyq deńgeıde moıyndalǵan aýmaǵynan tys jerde salǵan qalalar, jekelegen aýdandar men kıbýtster atalady.
Bir kún buryn ızraıldik qonystanýshylar záıtún jınap júrgen palestınalyqtarǵa shabýyl jasap, «Vashıngton post» gazetiniń jýrnalısi Haıdı Levınge de kúsh qoldanǵan. Olar jýrnalısti jerge qulatyp, aıaqtarymen tepkilegen, sondaı-aq kameralary men telefonyn tartyp alǵan.
Basylymnyń habarlaýynsha, jýrnalıstiń denesinde kóptegen jyrtylǵan jara anyqtalyp, qabyrǵasy men tórt omyrtqasy synǵan. Shabýyl saldarynan saýsaqtarynyń biri qatty zaqymdanǵandyqtan, oǵan qolyna ota jasaý qajet.
Jýrnalıstke jasalǵan shabýylǵa qatysty pikir bildirgen Netanıahý «arabtar men ásire solshyl belsendiler shamamen 40 jas ızraıldikpen qaqtyǵysqa tústi» dep málimdedi.
Osy aıdyń basynda da ızraıldik qonystanýshylar Palestına aýmaǵynda AFP agenttiginiń fotografy Djafar Ashtıege shabýyl jasaǵan. Olar ony myltyqtyń dúmimen uryp, jabdyqtaryn tartyp alǵan.
Ulybrıtanııa, Frantsııa jáne Kanada Izraıl qonystarynda óndirilgen taýarlarǵa sanktsııa engizdi.
2026 jylǵy qyrkúıekte Ulybrıtanııa, Frantsııa jáne Kanada Iordan ózeniniń batys jaǵalaýyndaǵy halyqaralyq quqyq turǵysynan zańsyz dep sanalatyn Izraıl qonystarynda óndirilgen taýarlarǵa sanktsııa engizdi.
Danııa, Fınlıandııa, Islandııa, Irlandııa, Norvegııa, Polsha, Portýgalııa, Ispanııa jáne Shvetsııa da osyndaı sharalardy engizý múmkindigin qarastyryp jatqanyn málimdedi.
Buǵan deıin ızraıldik qonystanýshylardyń Iordan ózeniniń batys jaǵalaýynda palestınalyq otbasynyń úılerin órtegeni habarlanǵan bolatyn.
