Izraıldik kınokompanııalarmen yntymaqtastyqtan bas tartqan tanymal tulǵalar sany 4 myńnan asty
ASTANA. KAZINFORM – Álemge áıgili akterler, rejısserler men prodıýserler — olardyń qatarynda «Oskar», BAFTA, «Emmı» jáne Kann kınofestıvaliniń laýreattary da bar — Izraıldiń genotsıd pen aparteıd qylmystaryna qatysy bar kınokompanııalarymen (festıvalder, kınoteatrlar, baspagerler men prodıýserlik kompanııalar) yntymaqtastyqtan bas tartatyny týraly ortaq málimdemege qol qoıdy. Bul qujatqa qol qoıǵandar sany 4 myńnan asty, dep jazdy Anadoly.
8 qyrkúıekte jarııalanǵan málimetke sáıkes, bul hatqa alǵashynda 1300-den astam adam, sonyń ishinde Olıvııa Kolman, Mark Rýffalo, Rız Ahmed, Tılda Sýınton, Haver Bardem jáne Sıýzan Sarandon syndy tanymal akterler, sondaı-aq rejısserler Iorgos Lantımos, Ava DıýVerneı jáne Adam Makkeı qol qoıǵan. Qazirgi ýaqytta qujatty qoldaǵandar sany qysqa merzim ishinde 4 myńnan asty.
Hoakın Fenıks, Emma D’Arsı, Erık Andre, Rýnı Mara, Gaı Pırs, Endrıý Garfıld, Emma Stoýn jáne Ellıot Peıdj sııaqty kóptegen tanymal tulǵalar da osy málimdemege qosylyp, Izraıldik kınokompanııalarmen jumys istemeıtinin málimdedi.
Mátinde kıno prodıýserleri, akterler, kıno salasynyń qyzmetkerleri men uıymdary kınonyń qoǵamdyq pikirdi qalyptastyrýdaǵy róline jaýapty ekenin túsinetini aıtylyp, bylaı delingen:
— Gaza sektorynda kóptegen úkimetter jappaı qyryp-joıýdy qoldap otyrǵan bul qıyn kezeńde biz qatygez terrordyń seriktesine aınalmaý úshin bar kúshimizdi salýymyz kerek.
Mátinde Halyqaralyq Sottyń Gazada genotsıd qaýpi bar ekenin «aqylǵa qonymdy» dep tanyǵany jáne Izraıldiń palestınalyq aýmaqtardy basyp alýy men aparteıd qoldanýy zańsyz dep sheshkeni eske salynyp, barlyq adamdar úshin teńdik, ádildik jáne erkindikti qorǵaý — elemeýge bolmaıtyn moraldyq mindet ekeni atap ótilgen.
— Biz palestınalyq halyqqa qarsy jasalyp jatqan zorlyq-zombylyqqa únsiz qalmaı, óz daýsymyzdy kóterýimiz kerek, — delingen málimdemede.
Palestınalyq kınematografıster halyqaralyq kınoındýstrııany únsizdikti toqtatýǵa jáne palestınalyqtarǵa jasalyp jatqan adamgershilikke jatpaıtyn qatynastar men násilshildikke qarsy shyǵýǵa shaqyrǵan.
Qujatta, sondaı-aq, kelesi joldar keltirilgen:
— Aparteıdke qarsy kúres júrgizgen jáne óz fılmderin Ońtústik Afrıkada kórsetýden bas tartqan «Aparteıdke qarsy kınematografıster» uıymynan shabyt alǵan biz — kıno salasynyń ókilderi — palestınalyqtarǵa qarsy genotsıd pen aparteıdke qatysy bar ızraıldik kınokompanııalarmen (festıvalder, kınoteatrlar, baspagerler, prodıýserlik kompanııalar) jumys istemeýge, olardyń is-sharalaryna qatyspaýǵa jáne fılmderin kórsetpeýge mindettenemiz.
Eske sala keteıik, buǵan deıin Túrkııanyń birinshi hanymy Emıne Erdoǵan Melanııa Trampqa hat joldap, Gaza sektoryndaǵy gýmanıtarlyq daǵdarysqa Ýkraınadaǵy qaqtyǵysqa kórsetken sezimtaldyǵymen birdeı mán berýge shaqyrǵan edi.