Izraıldik qarý-jaraq shyǵaratyn Rafael kompanııasy Frantsııa úkimetin sotqa bermek
ASTANA. KAZINFORM – Izraıldiń qorǵanys salasyndaǵy Rafael kompanııasy Frantsııa úkimetin sotqa bermek. Bul sheshim Frantsııanyń Le-Býrje qalasynda ótken halyqaralyq avıa-ǵarysh kórmesinde Izraıldiń bes kompanııasy — Israel Aerospace Industries (IAI), Rafael, UVision, Elbit jáne Aeronautics — ornalastyrylǵan pavılondarǵa kirýge tyıym salynǵannan keıin qabyldanǵan, dep jazdy Euronews.
Frantsııa bıligi mundaı shekteýdi kórmege qoıylǵan shabýyldyq qarý-jaraq Gaza sektorynda qoldanylýy múmkin degen ýájben túsindirgen. Izraıldik kompanııa ókilderi bul sheshimge qatty narazylyq bildirip otyr.
– Biz Frantsııa úkimetin qarjylyq shyǵyn keltirgeni jáne jalǵa alǵan múlkimizge qoljetimdilik bermegeni úshin sotqa bergeli otyrmyz. Eger sizde zańdy túrde jalǵa alynǵan múlik bolsa, al bireý oǵan kirýge tosqaýyl qoısa – bul zańǵa qaıshy. Sondyqtan biz bul áreketti ádiletsizdik dep eseptep, sotqa júginemiz, – dedi Rafael kompanııasynyń atqarýshy vıtse-prezıdenti Shlomo Toaff.
Toaff kórmeniń aldynda bolǵan jaıttardy bylaı dep baıandady:
– Bul pavılondy biz bir jyl buryn jalǵa alǵanbyz. Stendtiń syzbasyn birneshe aı buryn frantsýz bıligine jiberdik. Barlyq jabdyqpen kedennen óttik – bul shamamen bir aı buryn boldy. Alaıda kórmeniń qarsańyndaǵy túnde olar eshqandaı resmı eskertý jasamastan bizdiń pavılondy qorshaýǵa aldy, – dedi ol.
Elbit Systems kompanııasy da óz stendiniń jabylýyna baılanysty Parıj bıligin kemsitýshilik jasady dep aıyptady.
– Men qatty kóńilim qaldy. Biz bul kórmege kóp qarjy saldyq. Bul sheshimniń logıkasyn túsinbeı otyrmyz. Bizdiń oıymyzsha, bul — kemsitýshilik, sebebi basqalar da dál sondaı júıelerdi kórsetip jatyr, – dedi Elbit Systems kompanııasynyń aǵa vıtse-prezıdenti Sasson Meshar.
Biraq Frantsııa premer-mınıstri úkimet sheshimin qorǵap otyr.
– Frantsııanyń dıplomatııalyq ustanymyn, ásirese Gaza sektoryndaǵy jaǵdaıǵa qatysty alańdaýshylyǵyn eskere otyryp, biz mundaı kórmede shabýyldyq qarýdyń bolýy orynsyz ekenin bildirýimiz qajet boldy, – Frantsııa premer-mınıstri Fransýa Baırý.
Aıta keteıik, Rafael, Elbit jáne IAI — basqarylatyn bomba men zymyrandar, al UVision — drondar shyǵarady.
Shlomo Toaff kórme kezindegi taǵy bir jaıtty aıtyp berdi:
– Búgin tańerteń kórme qyzmetkeri kelip, eger jabdyqtyń bir bóligin alyp tastamasam, pavılon qabyrǵalaryn qulatatynyn aıtty. Men buǵan: “Eshteńe almaımyn. Sizderde sheshim qabyldaýǵa jetkilikti ýaqyt boldy, biraq bárin túnde jasaýdy tańdadyńyzdar, – dep jaýap berdim.
Bul — Izraıldik qarý óndirýshi kompanııalar Frantsııada tosqaýylǵa alǵash ret ushyrap otyrǵan jaǵdaı emes. Byltyr maýsymda olardy Eurosatory jerústi qarý-jaraq kórmesine, al qarashada Euronaval áskerı-teńiz kórmesine qatystyrýdan bas tartqan. Degenmen sol kezde Izraıl bul sheshimdi Frantsııa sotynda sátti daýlaǵan bolatyn.
Eske sala keteıik, buǵan deıin Frantsııanyń Strasbýrg qalasynda Eýroparlamenttiń kezekti kóshpeli sessııasy barysynda eýrokomıssııa Izraılge qarý-jaraq jetkizbeıtinin aıtqan edi.