Izraıldik kompanııa Qaraǵandyny «Aqyldy qalaǵa» aınaldyrmaq
ASTANA. QazAqparat - Qaraǵandy oblysynyń ákimi Erlan Qoshanov Izraıl Memleketiniń Qazaqstan Respýblıkasynda jáne Qyrǵyz Respýblıkasyndaǵy Tótenshe jáne Ókiletti Elshisi Mıhael Brodskıımen kezdesti. Kezdesý barysynda aımaqpen seriktestikti damytý máseleleri talqylandy, dep habarlaıdy oblystyq ákimdiktiń baspasóz qyzmeti.
Kezdesýde, sondaı-aq, iri ızraıldik kompanııalar MER Group jáne NETAFIM ókilderi boldy. Bıznesmender oblys qalalary men aýyl sharýashylyǵynda «aqyldy» tehnologııalardy engizý boıynsha qyzmetterdi usyndy.
«Qaraǵandy oblysy elimizdiń iri ónerkásip aımaǵy bolyp tabylady. Ekonomıkanyń negizgi bóligin qara jáne tústi metallýrgııa, taý-ken ónerkásibi, mashına qurylysy quraıdy. Oblysymyzda óndiriletin ónimder 50-den astam elge eksporttalady», - dedi Erlan Qoshanov.
Ol birinshi kezekte smart-tehnologııalar salasyndaǵy jańashyldyqtar qyzyqty ekenin atap ótti.
«Sizder biletindeı, Memleket basshysy óziniń Qazaqstan halqyna Joldaýynda búgingi tańdaǵy negizgi kezeń «Aqyldy qala» kontseptsııasyn iske asyrý ekenin atap ótti, - dedi oblys ákimi. - Qaraǵandy oblysynda naqty atqarymdar bar. Biz sandyq júıeni engizý úshin 11 baǵytty anyqtadyq. Olar densaýlyq saqtaý, bilim, qaýipsizdik, qalany basqary jáne taǵy basqalary. Nátıjeler bar, alaıda alǵa qaraı, basqa salalarǵa jyljý kerek. Biz osy baǵytta ızraıldik kompanııalarmen jumys jasaýǵa daıynbyz».
Aımaq basshysy jobalar negizinen memlekettik-jeke menshik seriktestik júıesi boıynsha bolatynyn atap ótti.
«Mer Systems» kompanııasynyń ókildigi MER Telecom Kazakhstan bas dırektory Vladıslav Berkovıch áleýetti seriktestik úshin baǵyttardy usyndy. Onyń sózinshe, kompanııa Izraıl men basqa da elderde «aqyldy» kóshe jaryqtary, qorǵanys jáne TJM salalarynda mobıldi ortalyqtar qurý, aqparattyq qorǵanysty qamtamasyz etý boıynsha jobalardy sátti iske asyrǵan.
NETAFIM ızraıldik kompanııa tamshylap sýarý, jylyjaı keshenderin salý boıynsha óz tehnologııalaryn usyndy.
«Astanada ótken EKSPO-2017 Halyqaralyq kórmesi barysynda bizde Qaraǵandy oblysynyń eksporttyq jaǵdaıymen tanysý múmkindigi boldy. Biz búgin seriktestikti damytý boıynsha kelisý úshin ádeıi keldik. Qaraǵandy oblysynyń múmkindikteri kóp. Olar: myqty ónerkásip, damyǵan ınfraqurylym, geografııalyq ornalasýy, ıaǵnı astanaǵa jaqyndyǵy jáne tranzıttik múmkindikter, sonymen qosa halyq áleýeti. Osy basymdyqtardy paıdalaný kerek. Men bizdiń kelisimge keletinimizge, jáne de bıznesmenderdiń ózara paıdaly seriktestikke qol jetkizetinderine senimdimin», - dep qorytyndylady kezdesýdi Mıhael Brodskıı.
