Izraıldegi jerlesterdi alyp qaıtý úshin erteń Almatydan Tel-Avıvke ushaq shyǵady
10 qazanda «Eır Astana» áýe kompanııasy qazaqstandyq azamattardy Izraılden alyp qaıtý úshin Aqtaý qalasyna tehnıkalyq qoný arqyly Almaty - Tel-Avıv - Almaty baǵyty boıynsha KS-6490/6500 reısin oryndaýdy josparlap otyr. Bul týraly Kazinform agenttigi Azamattyq avıatsııa komıtetine siltememen habarlaıdy.
Almaty qalasynan ushý saǵat 8:00-ge, Tel-Avıv qalasynan ushý jergilikti ýaqyt boıynsha saǵat 12:50-ge josparlanǵan.
«Eır Astana» áýe kompanııasynyń aqparaty boıynsha, Tel-Avıv qalasynyń áýejaıy tarapynan reıstiń qoný jáne ushý ýaqytynyń bekitilýi kútilip otyr.
«Tasymaldaýǵa kez kelgen kúnge avıabıletteri bar jolaýshylar qabyldanady. Bir jolaýshyǵa 8 kg deıin bir qol júgi jáne 20 kg deıin bir tekserilgen joljúk ruqsat etiledi. Avıabıletteri joq qazaqstandyqtar QR Elshiligi arqyly arnaıy tarıf boıynsha satyp ala alady. Jolaýshylar tizimin Qazaqstannyń Izraıldegi elshiligi de telefon arqyly jasaıdy: +972 (3) 741 78 05, +972 55 273 3813, +7 700 111 31 96. Jolaýshylar Tel-Avıv áýejaıyna ushýdan bes saǵat buryn kelýi kerek. Jolaýshylardan áýejaıǵa barǵan kezde joǵary qaýipsizdik sharalaryn saqtaýdy suraımyz», - delingen áýe kompanııa habarlamasynda.
