Izraıldegi saılaý: oppozıtsııa Netanıahýdan ozyp tur
ASTANA. KAZINFORM — Izraıldegi saılaýda oppozıtsııa Netanıahý koalıtsııasynan ozyp tur, biraq basymdyqqa jete almady, dep habarlaıdy Anadoly.
Izraılde tórt jylda alǵash ret ótken jalpy saılaýdan keıin jarııalanǵan ekzıtpoldardyń aldyn ala nátıjesi boıynsha, Izraıl armııasy Bas shtabynyń burynǵy bastyǵy Gadı Aızenkot bastaǵan oppozıtsııalyq blok premer-mınıstr Bınıamın Netanıahý basqaratyn bıleýshi koalıtsııadan ozyp tur. Alaıda oppozıtsııa úkimet qurýǵa qajetti basym daýysqa ıe bola almady.
Jergilikti ýaqyt boıynsha saǵat 07:00-de bastalǵan daýys berý 22:00-de aıaqtaldy. Osydan keıin ekzıtpoldardyń nátıjeleri jarııalandy.
Izraıldiń KAN memlekettik telearnasy taratqan aldyn ala málimetke sáıkes, Aızenkot bastaǵan oppozıtsııalyq blok Knessetten 53 oryn alýy múmkin. Al Netanıahý basqaratyn bıleýshi blokqa 50 mandat boljanyp otyr.
Degenmen oppozıtsııa 120 orynnan turatyn Izraıl parlamentinde koalıtsııalyq úkimet qurý úshin qajet 61 mandatqa ıe bola almady.
Bul saılaýda Izraıl azamattary sanalatyn palestınalyqtardyń belsendiligi joǵary boldy. Olardyń múddesin bildiretin eki arab tizimi jalpy alǵanda Knessetten 17 oryn alýy múmkin.
Ekzıtpoldarǵa sáıkes, saılaýaldy básekede Netanıahý basqaratyn «Lıkýd» partııasy kósh bastap tur. Oǵan 25 mandat boljanǵan. Al Aızenkottyń «ıAshar» partııasy 21 orynmen ekinshi orynda keledi.
Oppozıtsııadaǵy ózge kúshterdiń qatarynda burynǵy premer-mınıstrler Naftalı Bennet pen ıAır Lapıdpen baılanysty «Birge» tizimi 14 mandat alýy múmkin. Burynǵy qorǵanys mınıstri Avıgdor Lıberman basqaratyn «Izraıl — bizdiń úıimiz» partııasyna 8 oryn, al ıAır Golan jetekshilik etetin «Demokrattar» partııasyna 10 oryn boljanyp otyr.
Bıleýshi blok quramyndaǵy ýltraortodoksaldy «ShAS» jáne «Tora ıýdaızmi» partııalarynyń árqaısysy 6 mandattan alýy múmkin.
Netanıahýdyń odaqtastary arasynda ulttyq qaýipsizdik mınıstri Itamar Ben-Gvırdiń ásire ońshyl «Otsma Iehýdıt» partııasyna 7 oryn, al qarjy mınıstri Betsalel Smotrıchtiń «Dinı sıonızm» partııasyna 6 mandat boljanǵan.
«Hadash», «Taal» jáne «Balad» partııalary kiretin, Izraıl azamattary sanalatyn palestınalyqtardyń múddesin bildiretin Birikken tizim 10 mandat alýy múmkin. Al Mansýr Abbas basqaratyn RAAM partııasyna 7 oryn boljanyp otyr.
Saılaýdyń túpkilikti nátıjeleri yqtımal shaǵymdar men apellıatsııalar qaralǵannan keıin, segiz kúnnen keshiktirilmeı jarııalanady dep kútiledi.
Osyǵan deıin Izraıldiń parlamentine daýys berý bastalǵanyn jazǵanbyz.
