Izraıldegi qaqtyǵys: Qaı elder óz azamattaryn evakýatsııalaýdy bastady
Senbi kúni Palestınanyń HAMAS qozǵalysy Izraılge shabýyl jasady. Osyǵan baılanysty shet memleketter qaqtyǵys aımaqtarynan óz azamattaryn evakýatsııalap jatyr, dep habarlaıdy Kazinform agenttigi.
Alǵashqylardyń biri bolyp Polsha óz azamattaryn evakýatsııalaýdy bastady. Muny atalǵan eldiń Prezıdenti Andjeı Dýda málim etti. Buǵan deıin Polshanyń LOT memlekettik avıakompanııasy Tel-Avıvtegi Ben-Gýrıon áýejaıyna reısterdi toqtatqan bolatyn.
«Qazirgi ýaqytta Izraıldegi polıaktardy evakýatsııalaý úshin áýe kúshteriniń ushaqtaryn jiberemiz. Bizdiń sarbazdar azamattardy bortqa mingizý kezinde tártip pen qaýipsizdikti qamtamasyz etedi», – dep jazdy Andjeı Dýda «H» áleýmettik jelisindegi óz paraqshasynda.
Búgin tańerteń Polsha tarapy jibergen úsh áskerı ushaqtyń birinshisi Tel-Avıv áýejaıyna qonyp, onda jınalǵan 120-ǵa jýyq adamdy Varshavaǵa jetkizdi.
Sonymen qatar Polsha Gretsııanyń áýe keńistigi arqyly ushýǵa ruqsat alý boıynsha kelissóz júrgizip jatyr. Oǵan Portýgalııa da qosyldy. Óıtkeni ol elde taıaýda Izraılge evakýatsııalyq maqsattaǵy borttar jibermek.
Brazılııa úkimeti de qaqtyǵys aımaqtarynan óz azamattaryn alyp shyǵýdy josparlap otyr. Atalǵan eldiń Syrtqy ister mınıstrligi usynǵan aqparatqa saı, búgin Izraılge 6 ushaq jiberiledi.
Taılandtyń premer-mınıstri Stretta Tavısın Gaza sektoryndaǵy HAMAS sodyrlarynyń shabýylynan keıin taı azamattaryn Izraılden evakýatsııalaýǵa buıryq berdi. Resmı málimetke sáıkes, shıelenis kezinde Taılandtyń eki azamaty qaza taýyp, 8-i jaralanyp, 12-si tutqynǵa alynǵan.
Lıtva bıligi de Izraıldegi óz azamattaryn Vılnıýske evakýatsııalamaq. Búgin otanyna oralýǵa nıetti lıtvalyqtar úshin arnaıy reıs uıymdastyrylady.
Vengrııa bolsa búgingi túnde eki ushaqpen Izraılden 215 adamdy evakýatsııalady. Muny osy eldiń Syrtqy ister mınıstri Pıter Sıııarto Facebook-tegi paraqshasynda jazdy.
Búgin tańerteń Bolgarııa úkimeti jibergen ekinshi ushaq Izraıldegi 87 adamdy elge jetkizdi. Osydan bir kún buryn 92 bolgar azamaty arnaıy reıspen otanyna oralǵan edi.
Tel-Avıvtegi AQSh konsýldyǵy Palestına men Izraıldegi amerıkalyqtardy Lod áýejaıy arqyly kez kelgen ýaqytta evakýatsııalaýǵa daıyn ekenin málim etti.
HAMAS qozǵalysynyń shabýylyna baılanysty Vıfleem qalasynda qalyp qoıǵan Úndistannyń 27 azamaty Egıpetke evakýatsııalandy.
Olar odan ári otanyna oralmaq. Air India áýe kompanııasy Izraılmen tikeleı áýe qatynasy toqtaǵannan keıin ekıpaj múshelerin jáne basqa da eki qyzmetkerdi Tel-Avıvten Efıopııanyń áýe keńistigi arqyly evakýatsııalaǵanyn habarlady. Sondaı-aq Úndistan úkimeti qalyp qoıǵan stýdentterdi Izraılden qaıtarý boıynsha jumys júrgizip jatyr.
Osy ýaqytqa deıin birneshe iri avıakompanııa Tel-Avıv baǵytyndaǵy reısterdi toqtatty. Olardyń arasynda American Airlines, Air France, Lufthansa, Emirates, Air France, Ryanair jáne Aegean Airlines sııaqty kompanııalar bar.
Al Qazaqstan evakýatsııalyq reısti 10 qazan kúni uıymdastyrady. Air Astana áýe kompanııasy Aqtaý qalasyna tehnıkalyq qoný arqyly Almaty-Tel-Avıv-Almaty baǵyty boıynsha KS-6490/6500 reısin oryndaýdy josparlap otyr. Almaty qalasynan ushý saǵat 08:00-ge, Tel-Avıv qalasynan ushý jergilikti ýaqyt boıynsha saǵat 12:50-ge josparlanǵan.
Barlyq suraqtar boıynsha avıakompanııanyń help.airastana.com kómek ortalyǵyna habarlasý qajet, tel.: +7 (727) 244 44 78 ( qońyraýlar úshin) jáne +7 702 702 0074 (WhatsApp).
