Izraılde túrme kúzetine qoltyraýyndardy paıdalaný jobasy toqtatyldy
ASTANA. KAZINFORM — Izraılde sot penıtentsıarlyq mekemelerdiń birin qoltyraýyndardyń kómegimen kúzetý bastamasyn ýaqytsha toqtatty, dep habarlaıdy Kazinform agenttiginiń Taıaý Shyǵystaǵy menshikti tilshisi.
Ierýsalımniń okrýgtik soty jeksenbi kúni Izraıldiń ulttyq qaýipsizdik mınıstri Itamar Ben-Gvır usynǵan joba aıasynda Nil qoltyraýyndaryn «Ktsıot» túrmesine kóshirýge ýaqytsha tyıym saldy. Bul týraly The Times of Israel habarlady.
Sheshim Izraıldegi janýarlardy qorǵaýmen aınalysatyn «Janýarlarǵa ómir syılańdar» uıymynyń aryzynan keıin qabyldandy. Sot negizgi is qaralǵanǵa deıin memlekettik organdarǵa qoltyraýyndardy izdestirýge jáne olardy tasymaldaýǵa daıyndaýǵa tyıym saldy.
Memlekettiń resmı jaýaby 16 tamyzǵa deıin usynylýy tıis. Sonymen qatar Izraıl BAQ-tarynyń málimetinshe, túrme kesheniniń aınalasyndaǵy qorǵanys oryn qazý jumystary jalǵasyp jatyr.
Janýarlardy qorǵaýshylardyń aıtýynsha, qoltyraýyndardy túrme kúzetine paıdalaný týraly sheshim ókilettikten tys qabyldanǵan jáne mamandardyń janýarlarǵa, adamdarǵa ári qorshaǵan ortaǵa tónýi múmkin qaýip týraly eskertýlerine qaramastan júzege asyrylǵan.
Jobaǵa sáıkes, palestınalyq tutqyndar men qaýipsizdik jáne terrorızmge qatysty ister boıynsha ustalǵandar qamalatyn «Ktsıot» túrmesiniń aınalasyndaǵy qorǵanys orynda Nil qoltyraýyndaryn ornalastyrý kózdelgen. Mınıstrdiń pikirinshe, bul nysannyń kúzetin kúsheıtip, qashý áreketteriniń aldyn alýǵa múmkindik beredi.
Osy bastamany iske asyrý úshin Izraıldiń qorshaǵan ortany qorǵaý mınıstri Idıt Sılman Nil qoltyraýynynyń quqyqtyq mártebesin ózgertip, ony «qolǵa úıretilgen jabaıy janýarlar» sanatyna engizgen bolatyn. Bul kúshtik qurylymdarǵa janýarlardy berýge quqyqtyq múmkindik ashty.
Alaıda Izraıldiń Tabıǵat jáne saıabaqtar basqarmasy men mınıstrliktiń zań keńesshisi bul bastamaǵa qarsy shyǵyp, jobanyń ǵylymı ári kásibı negizi joq ekenin jáne adamdar men janýarlarǵa qaýip tóndirýi múmkin ekenin málimdedi.
Óz kezeginde Itamar Ben-Gvır sot sheshimin synǵa alyp, onyń túzeý júıesiniń qaýipsizdigin kúsheıtýge baǵyttalǵan sharalardy júzege asyrýǵa kedergi keltirip otyrǵanyn aıtty.
