Izraılde týrıstik soqpaqtan tabylǵan bomba jarylyp, mektep oqýshysy qaza tapty

Izraıldiń soltústiginde, Lıvanmen shekaralas mańda, jarylmaı qalǵan oq-dári jarylyp, 13 jasar mektep oqýshysy qaza tapty, taǵy 24 oqýshy men muǵalim jaralanǵan.

The Times of Israel gazetiniń habarlaýynsha, jarylys dúısenbi kúni Ramım jotasy aımaǵynda bolǵan.

Maalot-Tarshıha qalasyndaǵy ORT mektebiniń oqýshylary «Izraıl soqpaǵy» boıymen ótetin úsh kúndik ulttyq jaıaý serýenge qatysqan. Armııa men polıtsııanyń aldyn ala baǵalaýy boıynsha, serýendeý kezinde oqýshylardyń biri lıvandyq «Hezbolla» tobynyń zymyran shabýylynan keıin jarylmaı qalǵan kishigirim oq-dárige tap bolǵan.

Habarlarǵa qaraǵanda, tabylǵan oq-dári birden jarylmaǵan. Oqýshylardyń biriniń ákesi Elııagý Galıl Izraıldiń 13-shi arnasyna bergen suhbatynda aıtqandaı, onyń uly oq-dárini ustap, balalar bir-birine berip, sýretke de túsken.

Aldyn ala tergeý málimetteri boıynsha, oqýshylardyń biri zatty rıýkzagyna salǵan, al birneshe mınýttan keıin jarylys bolǵan. Polıtsııa ókili buǵan deıin oq-dári oqýshynyń qolynda jarylyp ketkenin habarlaǵan bolatyn. Tergeý oqıǵalardyń naqty retin anyqtap jatyr.

Qaıtys bolǵan bala 9-synyp oqýshysy Elazar ıAır Vılenskı ekeni anyqtaldy. 13 qazan kúngi tańdaǵy aqparatqa sáıkes, jaralanǵan bes balanyń jaǵdaıy aýyr, olardyń biri jasandy tynys alý apparatyna qosylǵan. Zardap shekken muǵalimge ota jasalǵan.

Qutqarýshylar kelgenge deıin oqýshylar bir-birine kómektesken. Jaralylar Izraıldiń soltústigindegi úsh aýrýhanaǵa jetkizildi, al kórshiles baǵyttardaǵy basqa mektep toptary evakýatsııalandy.

Tergeýdegi negizgi suraqtardyń biri jaıaý serýendeýdiń qalaı kelisilgendigi bolyp otyr. Izraıl BAQ-tarynyń habarlaýynsha, shaıqas saldaryna baılanysty aımaqtaǵy ormandar men lagerlerge kirýge tyıym salatyn belgiler ilingen.

Ormandy qalpyna keltirýge jaýapty Evreı ulttyq qorynyń basshysy ondaǵy jumystar áli aıaqtalmaǵanyn jáne mektep saparlaryn maquldaǵan jaýapty organdaryna baǵdardyń jabyq ekendigi týraly habarlanǵanyn málimdedi. Onyń aıtýynsha, uıym aýmaqty ashý týraly ótinishti de keri qaıtarǵan.

Izraıl Bilim mınıstrligi óz kezeginde bekitilgen baǵdar tyıym salynǵan aýmaqtan ótpegenin málimdedi.

— Serýenniń baǵdary maquldanǵan kezde, zymyran qaldyqtaryna nemese jarylmaǵan oq-dárilerge tıisýge qatań tyıym salynǵan jáne joldan tabylǵan kez kelgen zattar týraly dereý habarlaýdy talap etetin naqty qaýipsizdik nusqaýlary berildi, — delingen mınıstrlik málimdemesinde.

Ásker, polıtsııa jáne mınıstrlik toptyń naqty baǵdaryn tekserip jatyr. Ynet málimetinshe, oqýshylar eskertý belgisin kórmegenderin aıtqan. Eldiń soltústiginde aldaǵy kúnderi josparlanǵan mektep serýenderi toqtatyldy.

Izraıl sarapshylarynyń aldyn ala baǵalaýy boıynsha, jarylǵan zat kassetalyq oq-dári bolǵan.

Izraıl BAQ-tarynyń habarlaýynsha, mundaı oq-dáriler shaǵyn bólikterge bólinip, keń aýmaqqa taralady. Olardyń keıbireýleri soqqy kezinde jarylmaı qalady jáne shaıqas aıaqtalǵannan keıin de adamdar úshin qaýipti bolyp qala beredi.

Eske sala keteıik, Lıvanda Izraıl shabýyldarynan qaza tapqandar sany 4 387 adamǵa jetti.

Izraıl áskeri atysty toqtatý rejımine qaramastan Lıvannyń ońtústigine soqqy jasady.