Izraılde soǵys jaǵdaıyndaǵy tergeýge shekteý qoıylmaq

ASTANA. KAZINFORM — Izraılde áskerı qyzmetkerlerge qatysty isterdi tergeý boıynsha bas prokýrordyń ókilettigin shekteýdi kózdeıtin zań jobasy daıyndalyp jatyr, dep habarlaıdy Anadoly.  

Izraıldiń memlekettik KAN telearnasynyń habarlaýynsha, bul zań jobasy kelesi aptada mınıstrler komıtetinde qaralady.

Usynysqa sáıkes, soǵys jaǵdaıynda áskerı qyzmetkerlerge qatysty tergeýdi bastaý úshin bas prokýrorǵa Izraıl Qarýly kúshteri Bas shtaby bastyǵynyń ruqsaty qajet bolady.

Zań jobasyn «Lıkýd» partııasynyń depýtaty Moshe Saada usynǵan, ony 16 depýtat qoldap qol qoıǵan. Degenmen, bul zańnyń kisi óltirý men jynystyq sıpattaǵy qylmysqa qatysty áreketterge taralmaıtyny naqty kórsetilgen.

Izraıl sheneýnikteriniń biri bul bastama áskerı qyzmetkerlerdi shetelde qylmystyq qýdalaýdan qorǵaý úshin qajet ekenin málimdedi.

Aıta ketý kerek, kóptegen ızraıldik áskerıler shetelge shyqpaýǵa májbúr bolǵan, sebebi olar Gaza sektorynda jasalǵan áskerı qylmystarǵa baılanysty qamaýǵa alyný qaýpinen qorqady.

Sonymen qatar, Izraıl armııasy 2024 jylǵy 23 naýryzda Gaza sektoryndaǵy Rafah qalasynda bolǵan oqıǵa sııaqty jaǵdaılarda da, áskerı qyzmetkerlerge qatysty sot tergeýine kedergi keltirýi múmkin. Sol oqıǵada 15 medıtsına jáne azamattyq qorǵanys qyzmetkeri qaza tapqan bolatyn. 

Aıta ketelik Iran Izraıldiń aspanyn tolyq baqylaýǵa alǵanyn málimdedi.