Izraılde SMS jazǵan júrgizýshilerge $3000 kóleminde aıyppul salý usynyldy

ASTANA. KAZINFORM — El úkimeti joldaǵy quqyqbuzýshylyqtarǵa, onyń ishinde kólik júrgizý kezinde telefon qoldanýǵa qatysty jazalardy kúsheıtýdi josparlap otyr, dep habarlaıdy Kazinform agenttiginiń menshikti tilshisi.

Izraıldiń kólik mınıstri Mırı Regev kólikpen ketip bara jatqan kezinde mátindik habarlama jibergeni úshin 10 000 shekelge (shamamen 3000 dollar) deıin aıyppul salý jospary bar ekenin jarııalady.

Ol bul týraly dúısenbi kúni Yedioth Ahronoth jańalyqtar toby uıymdastyrǵan kólik, energetıka jáne ınfraqurylym konferentsııasynda aıtty.

Mınıstrdiń sózinshe, polıtsııa aıyppuldy dereý salyp otyrady, is sotqa jiberilmeıdi.

— Eger polıtsııa júrgizýshini habarlama jazyp otyrǵan sátinde ustasa, oǵan dereý 10 000 shekel aıyppul salynady. Ol sotqa barmaıdy. Qaıtalanǵan jaǵdaıda kólik tárkilenedi, — dep keltirdi mınıstrdiń sózin Ynet basylymy.

Regev jol apattarynyń kóbeıýin júrgizýshilerdiń áreketimen baılanystyrdy.

— Jol apattarynyń 80 paıyzy — adamı faktordan bolady, — dedi ol. 

Buǵan sharshaý, mas kúıinde kólik júrgizý jáne mobıldi telefondy qoldaný sekildi faktorlar kiredi. Bıyl Izraıl joldarynda 400-den astam adam qaza tapty.

Usynylatyn bastamada aıyppul tek telefon qoldanýǵa ǵana emes, jolaqtardy kesip ótý, baǵdarshamnyń qyzyl túsinen ótý jáne mas kúıinde kólik júrgizý sııaqty quqyqbuzýshylyqtarǵa da qatysty bolady. Usynys Knessettegi ekonomıkalyq komıssııaǵa qaraýǵa jiberiledi.

— Men jol apattary úshin jaýapkershilikti sezinbeıtin adamdarǵa sabaq bolamyn. Degenmen júrgizýshilerdiń jaýapkershiligin arttyrý — jalǵyz jol, — dedi mınıstr. 

Ol polıtsııa men Izraıl ádilet mınıstrligi eń qaýipti quqyqbuzýshylyqtar tizimin ázirlep, jolda baqylaý júrgizetin mobıldi toptardy uıymdastyratynyn aıtty.

«Maarıv» basylymyna bergen suhbatynda Regev júrgizýshilerdi kepteliste turǵan kezde «qoǵamdyq kólikti paıdalanýǵa» shaqyrdy.

Sonymen qatar, ol avtobýs jáne temirjol jelilerin keńeıtý mınıstrliktiń basty basymdyqtarynyń biri bolyp qala beretinin aıtty.

Buǵan deıin Izraıl Syrtqy ister mınıstri Venesýelany óńirdiń turaqtylyǵyn buzdy dep aıyptady.