Izraılde saılaýǵa syrttan yqpal etý áreketi tekserilip jatyr

ASTANA. KAZINFORM — Sheteldiń saılaý protsesine aralasýy múmkin ekeni týraly aqparat Izraıldegi saıası kúshter arasyndaǵy kelispeýshilikti kúsheıtti, dep habarlaıdy Kazinform agenttiginiń menshikti tilshisi.

Izraılde saılaýǵa shetel yqpaly bolýy múmkin degen kúdik tekserilip jatyr
Foto: Anadolu

Izraıl Ortalyq saılaý komıssııasynyń tóraǵasy, Joǵarǵy sottyń sýdıasy Noam Zolberg 27 qazanda ótken parlament saılaýyna sheteldiń aralasýy múmkin degen kúdikke baılanysty Izraıldiń Jalpy qaýipsizdik qyzmetine (ShABAK) tergeý júrgizýdi tapsyrdy.

The Times of Israel basylymynyń habarlaýynsha, tekserý arab saılaýshylarynyń daýys berýge qatysýyn arttyrýǵa baǵyttalǵan shetelden zańsyz qarjylandyrý áreketterine qatysty.

Tergeýdiń bastalǵany beısenbide Zolbergtiń ShABAK basshysy Davıd Zınıge joldaǵan haty jarııalanǵannan keıin belgili boldy. Qujat bir kún buryn jiberilgen.

— Izraıldiń múddesine qaıshy áreket etetin sheteldik uıymdar qarjy bólip, saılaý barysyna zańsyz yqpal etýi múmkin degen aqparat tústi, — delingen hatta.

Zolberg qolda bar aqparattyń qanshalyqty negizdi ekenin ázirshe rastaı almaıtynyn, alaıda isti jan-jaqty tekserý qajet ekenin atap ótti. Ol arnaıy qyzmetke bir apta ishinde tergeý nátıjelerin usynýdy tapsyrdy.

Izraıldiń Channel 12 jáne Kan telearnalary men Ynet basylymynyń habarlaýynsha, Qatardan Izraıldegi arab uıymdaryna saılaýshylardyń daýys berýge qatysýyna jáne daýys berý nátıjelerine yqpal etý úshin qarajat aýdarylǵan bolýy múmkin.

Izraıldik BAQ silteme jasaǵan kúshtik qurylymdar ókilderiniń bul máselege qatysty pikirleri ártúrli. Keıbir derekkózder qosymsha tekserýdi qajet etetin jekelegen jaǵdaılar ǵana bar ekenin aıtady.

— ShABAK-tyń Izraıl saılaýyna shet memlekettiń aralasýy múmkin degen kúdik boıynsha júrgizip jatqan tergeýi barlyq boljamdy rastasa da, mundaı áreketterdiń aýqymy saılaý nátıjelerin ózgertýge jetkiliksiz bolar edi, — dep habarlady KAN News beısenbide Izraıl Ortalyq saılaý komıssııasyndaǵy joǵary laýazymdy sheneýnikke silteme jasap.

ShABAK tergeý ózderi jınaǵan barlaý málimetteri negizinde bastalǵanyn málimdedi. Qyzmettiń málimetinshe, buǵan saıası partııalar men jekelegen saıasatkerlerdiń qatysy joq. Tekserý áli jalǵasyp jatyr. Sondyqtan BAQ-ta yqtımal yqpal etý áreketteri týraly taraǵan aqparat ázirshe resmı túrde rastalǵan joq.

Vedomstvo tergeý naqty kúdikterge qatysty júrgizilip jatqanyn atap ótti. Bul jaǵdaı arab saılaýshylarynyń daýys berýiniń zańdylyǵyna kúmán keltirýge negiz bolmaıdy.

Qatar aıyptaýlardy joqqa shyǵardy

Óz kezeginde Qatar Syrtqy ister mınıstrligi Izraıldegi saılaý protsesine aralasqany týraly aıyptaýlardy úzildi-kesildi joqqa shyǵardy.

— Qatardyń Izraıldegi saılaýǵa aralasqany nemese onyń nátıjelerine yqpal etý maqsatynda qandaı da bir áreketti qarjylandyrǵany týraly málimdemelerdi úzildi-kesildi joqqa shyǵaramyz, — dedi Qatar Syrtqy ister mınıstrliginiń resmı ókili Madjıd ál-Ansarı.

Ol aıyptaýlardy Dohany Izraıldiń ishki saıası qaıshylyqtaryna tartýǵa baǵyttalǵan kezekti jalǵan aqparat naýqany dep atady.

— Keıbir ızraıldik saıasatkerlerdiń saıası sátsizdikteri úshin Qatardy kináli etip kórsetýge bolmaıdy, — dedi vedomstvo ókili.

Izraıldegi saıası kúshter ne deıdi?

Sheteldiń saılaý barysyna yqpal etýi múmkin ekeni týraly aqparat Izraıldegi saıası kúshter arasyndaǵy tartysty kúsheıtti.

«Lıkýd» partııasynyń ókilderi saılaý kezinde zań buzýshylyqtar bolýy múmkin ekenin málimdedi. Al oppozıtsııa tergeý júrgizýdi talap etip, naqty dáleldersiz saılaý qorytyndysyna kúmán keltirýge bolmaıtynyn eskertti.

Izraıl Ortalyq saılaý komıssııasy saılaýda jappaı burmalaýshylyqtar boldy degen aıyptaýlardy joqqa shyǵardy. Komıssııanyń bas dırektory mindetin atqarýshy Dın Lıvne saılaýdyń zań talaptaryna saı ótkenin jáne júıeli zań buzýshylyqtar týraly eshqandaı málimet túspegenin aıtty.

Aldyn ala nátıje boıynsha, premer-mınıstr Bınıamın Netanıahýdy qoldaıtyn kúshter 120 oryndyq Knessette 53 mandatqa ıe boldy. Oppozıtsııalyq blok 48 oryn alsa, arab partııalary rekordtyq 19 mandat ıelendi.

Alaıda negizgi saıası bloktardyń eshqaısysy úkimet jasaqtaýǵa qajetti 61 mandat jınaı almady.

Izraıl parlamenti saılaýyndaǵy daýystardyń basym bóligi 28 qazan, sársenbide sanalyp bitti. Al beısenbide Ortalyq saılaý komıssııasy qos konvertpen berilgen qalǵan bıýlletenderdi sanaý aıaqtalǵanyn habarlady.

Mundaı daýys berý tártibi áskerı qyzmetshilerge, dıplomattarǵa, aýrýhanada jatqan naýqastarǵa jáne ózge de azamattarǵa ózderi tirkelgen ýchaskeden tys jerde daýys berýge múmkindik beredi. Qos konvert saılaýshynyń eki ret daýys bermegenin tekserýge jáne daýys berý qupııasyn saqtaýǵa kómektesedi.

26-shaqyrylymdaǵy Knesset saılaýynyń túpkilikti nátıjeleri jaqyn arada jarııalanbaq.

Eske salaıyq, buǵan deıin Izraıldegi saılaýda oppozıtsııa Netanıahý koalıtsııasynan ozyp turǵanyn jazǵanbyz.