Izraılde saılaý qarsańynda Iranǵa soqqy berý máselesi talqylandy
ASTANA. KAZINFORM — Izraılde parlament saılaýy qarsańynda Iranǵa qarsy áskerı soqqylardy qaıta bastaý máselesi saıası tartysqa sebep boldy, dep habarlaıdy Kazinform agenttiginiń menshikti tilshisi.
Izraıl premer-mınıstri Bınıamın Netanıahý 27 qazanda ótetin Knesset saılaýy qarsańynda Iranǵa aldyn ala soqqy berýdi qoldamaıtynyn málimdedi. Bul týraly ol sársenbi kúni Izraıl armııasynyń radıosyna bergen suhbatynda aıtty.
Ol bul pikirin saılaý aldynda áskerı qaqtyǵysqa umtylyp otyr degen saıası qarsylastarynyń aıyptaýyna jaýap retinde bildirdi.
— Qazir mundaı qadamǵa baratyn qolaıly sát emes, odan esh paıda joq, — dedi Netanıahý.
Sondaı-aq ol saılaýdan keıin Iranǵa soqqy berý múmkindigi men Vashıngtonmen aradaǵy sońǵy kelissózderdiń mazmunyna túsinikteme bermedi. Premer-mınıstr Izraılge shabýyl jasalǵan jaǵdaıda, qarymta soqqy beretinin taǵy da atap ótti.
Netanıahýdyń aıtýynsha, Iran men oǵan jaqtas qarýly toptar saılaýǵa yqpal etý úshin Izraılge shabýyl jasaýy múmkin. The Times of Israel basylymynyń habarlaýynsha, qaýip Irannyń tikeleı shabýylynan nemese Gaza sektoryndaǵy HAMAS pen Lıvandaǵy «Hezbollanyń» áreketinen týyndaıdy.
Buǵan deıin BAQ Netanıahýdyń AQSh prezıdenti Donald Trampqa Izraıldegi parlamenttik jáne AQSh-taǵy aralyq saılaýlarǵa deıin Iranǵa qarsy áskerı operatsııalardy qaıta bastaýdy usynǵanyn habarlaǵan. Alaıda Izraıl premer-mınıstriniń keńsesi saılaý qarsańynda soǵysty qaıta bastaýǵa umtyldy degen aqparatty joqqa shyǵardy.
Inside Trump, Netanyahu's dilemma: Strike Iran before elections or wait https://t.co/MIVO8ea0KK
— Axios (@axios) October 13, 2026
In meetings with his security & intelligence chiefs in recent days, Netanyahu claimed it was Trump, not him, who initiated the discussion about possibly hitting Iran before the elections, per Israeli official. According to this account, Trump asked Netanyahu if Israel would join
— Barak Ravid (@BarakRavid) October 13, 2026
Sonymen qatar Izraıldiń qorǵanys mınıstri Israel Kats Irannyń shabýylyna «Hezbolla» qosylǵan jaǵdaıda, Lıvannyń ońtústiginde Izraıl armııasy baqylaýyndaǵy aýmaqty keńeıtetinin eskertti.
Lıvan aýmaǵyndaǵy Izraıl jarııalaǵan qaýipsizdik aımaǵyna barǵan Israel Kats armııanyń jańa qurlyqtaǵy operatsııaǵa daıyn ekenin málimdedi.
— «Hezbolla» aýyr soqqyǵa ushyrap, Lıvannyń ońtústigindegi Nabatııa men Lıtanı ózeni mańyndaǵy aýmaqtardan taǵy da aıyrylady. Bul jerler Izraıldiń turaqty qaýipsizdik aımaǵyna aınalady, — dedi mınıstr.
Kats Beırýttyń ońtústik mańyndaǵy «Hezbolla» ınfraqurylymyna soqqy jasalatynyn eskertip, jańa qaqtyǵys bastalǵan jaǵdaıda mıllıonnan astam lıvandyq shııttiń baspanasyn tastap, bosyp ketýi múmkin ekenin aıtty.
Eske sala keteıik, ótken aptada Tramp 3 qarashada ótetin AQSh-taǵy parlament saılaýyna deıin Iranǵa shabýyl jasamaıtynyn habarlaǵan edi.
