Izraılde parlamenttiń spıkeri saılandy, biraq úkimet áli jasaqtalǵan joq

ASTANA. KAZINFORM — Izraılde bılik úshin saıası kúres júrip jatyr, parlament saılaýynan keıin qazirgi premer-mınıstr Knessettegi basymdyǵynan aıyryldy, alaıda onyń qarsylastary áli jańa úkimet jasaqtaı almaı otyr, dep habarlaıdy Kazinform agenttiginiń Taıaý Shyǵystaǵy menshikti tilshisi.

Izraılde parlamenttiń spıkeri saılandy, biraq úkimet áli jasaqtalǵan joq
Foto: x.com / @KnessetENG

17 qarasha, seısenbi kúni Izraıl parlamenti Netanıahýdyń negizgi saıası qarsylasy Gadı Aızenkot basqaratyn tsentrıstik «ıAshar» partııasynyń ókili Matan Kahanany Knessettiń jańa spıkeri etip saılady.

The Times of Israel gazetiniń habarlaýynsha, onyń kandıdatýrasyn 66 depýtat qoldap, 52 depýtat qarsy daýys berdi.

Kahana bıleýshi «Lıkýd» partııasynyń ókili Amır Ohananyń ornyna keldi. Onyń saılanýy oppozıtsııa úshin 27 qazanda ótken parlamenttik saılaýdan bergi alǵashqy mańyzdy jetistik bolyp otyr.

— Izraıl Knesseti — memlekettiń barlyq azamatynyń úıi jáne men olardyń árqaısysynyń Knesset spıkeri bolǵym keledi, — dedi Kahana saılanǵannan keıin.

Knesset spıkeri laýazymynyń saıası mańyzy zor, sebebi spıker zań shyǵarý kún tártibine aıtarlyqtaı áser etedi jáne Knessetke qandaı zań jobalary usynylatynyn anyqtaıdy.

Oppozıtsııa ókiliniń saılanýy burynǵy Netanıahý úkimetiniń birneshe bastamalaryn qaıta qaraý múmkindigin ashady.

Atap aıtqanda, Aızenkottyń jaqtastary sot júıesine saıası yqpaldy arttyrǵan sot reformasynyń keıbir erejelerin joıýdy, sondaı-aq 2023 jyldyń 7 qazanynda Izraılge HAMAS shabýylyn táýelsiz tergeý komıssııasyn qurýdy kózdep otyr.

Talqylanyp jatqan bastamalardyń biri premer-mınıstrdiń ókilettik merzimin shekteýge qatysty bolýy da múmkin.

Sonymen qatar «Lıkýd» partııasy daýys berý nátıjelerin syn astyna alyp, saıası qarsylastaryn arab partııalarynyń qoldaýyna súıendi dep aıyptady. Aızenkot blogyna Knessettiń jańa spıkerin saılaý úshin qajetti kópshilik daýysty alýǵa arab depýtattarynyń daýysy múmkindik bergen bolatyn. 

27 qazandaǵy Knesset saılaýynda ońshyl jáne dinshil partııalarmen odaq qurǵan Netanıahý blogy Knessettegi 120 orynnyń 53-in ıelenip, parlamenttegi basymdyǵynan aıyrylǵan.

Onyń negizgi saıası qarsylastary, Aızenkot blogy jáne onyń jaqtastary 48 orynǵa ıe. Biraq 19 oryndy ıelengen arab partııalarynyń qoldaýymen olar jeke máseleler boıynsha basymdyqqa ıe bola alady.

Izraıl prezıdenti Itshak Gertsog buǵan deıin Aızenkotqa jańa úkimet qurýdy tapsyrǵan bolatyn. Degenmen, odaq qurmaq bolǵandar birqatar saıası máseleler boıynsha kelispeýshilikke tap bolǵandyqtan, bıleýshi koalıtsııa qurý týraly kelissózder aıaqtalmaı keledi.

Jańa úkimet jasaqtalmaıynsha, Netanıahý premer-mınıstr mindetin atqara beredi. Eger saıası partııalar bıleýshi koalıtsııa qura almasa, Izraılde 2027 jyly jańa saılaý ótkizilýi múmkin.

Buǵan deıin Izraıl oppozıtsııasy Netanıahýmen birlesken úkimet qurýdan bas tartqanyn habarlaǵan edik. 

Eldiń jańa úkimetin jasaqtaýǵa kirisken «ıAshar» partııasynyń jetekshisi Gadı Aızenkot Bınıamın Netanıahýdyń ulttyq birlik koalıtsııasyn qurý týraly usynysyn medıa-manevr dep atady.