Izraılde qalyp qoıǵan týrıster elden shyǵýǵa ótinim bere alady

ASTANA. KAZINFORM — Izraıldiń Týrızm mınıstrligi shuǵyl túrde elden ketkisi keletin sheteldik týrısterden ótinim qabyldaýdy onlaın-rejımde bastady, dep habarlaıdy TASS.

— Qaýipsizdik salasyndaǵy qazirgi jaǵdaıǵa baılanysty Týrızm mınıstrligi elden áýe arqyly ketýdi qalaıtyn týrısterden baılanys málimetterin jınaý jáne olardyń Izraılden múmkindiginshe tez arada shyǵýyn tıisti memlekettik organdarmen úılestirý týraly suranys aldy. Osy maqsatta týrıster toltyra alatyn onlaın-forma ázirlendi, — dep málimdedi vedomstvodan.

Mınıstrlik ókilderiniń aıtýynsha, týrısterdi evakýatsııalaý reısteri qashan bastalatyny týraly naqty aqparat ázirge joq.

Buǵan deıin Izraılde áýe keńistigi jabylǵaly 40 myń týrıst elden shyǵa almaı qalǵany habarlandy.

Sonymen qatar AQSh-tyń Izraıldegi elshiligi ázirge amerıkalyq azamattardy evakýatsııalaýǵa múmkindigi joq ekenin málimdedi.

Al búgin Izraıldiń Tel-Avıv qalasynda Lıtva azamattaryn evakýatsııalaý bastalǵany aıtyldy.