Izraılde hantavırýsty juqtyrýdyń alǵashqy jaǵdaıy tirkeldi
ASTANA. KAZINFORM — Izraıl aýmaǵynda hantavırýsty juqtyrýdyń alǵashqy jaǵdaıy anyqtaldy. Vırýs Shyǵys Eýropadan kelgen naýqastan tabylǵan, dep habarlaıdy The Jerusalem Post.
Basylym málimetinshe, patsıent birneshe aı buryn Shyǵys Eýropa elderiniń birinde bolǵan kezinde vırýstyń eýropalyq shtamyn juqtyrǵan. Sımptomdar paıda bolǵannan keıin ol dárigerlerdiń kómegine júgingen.
Qazirgi tańda naýqastyń jaǵdaıy turaqty dep baǵalanyp otyr. Ol jansaqtaý bólimine jatqyzylmaǵan jáne qatań oqshaýlaýdy qajet etpeıdi. Dárigerler onyń jaǵdaıyn baqylaýda ustap otyr.
Basylymnyń jazýynsha, bul jaǵdaı qazirgi tańda álemdik BAQ nazaryn aýdaryp otyrǵan MV Hondius krýızdik kemesindegi Ońtústik Amerıkada taralǵan Andes shtamynan ózgeshe.
Mamandardyń aıtýynsha, dál osy Andes shtamy asa qaýipti túrlerdiń biri sanalady.
Sırek jaǵdaıda ol adamnan adamǵa tyǵyz ári uzaq baılanys kezinde juǵýy múmkin.
Buǵan deıin Dúnıejúzilik densaýlyq saqtaý uıymy Argentınadan shyqqan krýızdik kemedegi segiz naýqastyń beseýinen hantavırýs rastalǵanyn habarlaǵan edi.
Aıta ketelik Hantavırýs anyqtalǵan laınerdegi jolaýshylar saıahatty jalǵastyratyny týraly jazǵan edik.
