Izraılde Gazany okkýpatsııalaý josparyna qarsy jappaı narazylyq ótti

ASTANA. KAZINFORM – Izraılde halyq Gazadaǵy tutqyndardy bosatý jóninde kelisim jasasýdy talap etip, jappaı narazylyq aktsııasyna shyqty. Nátıjesinde negizgi joldar jabylyp, poıyz qozǵalysy toqtady, dep habarlaıdy VVS.

Ierýsalım men Tel-Avıvte kóptegen kásiporyndar jumysyn toqtatty. Narazylar qala kóshelerinde jaıaý júrginshilerge kepilge alynǵandardy beıneleıtin sary lentalar taratty.

Ereýildi «Qazan keńesi» uıymdastyrdy. Ol tutqyndardyń týystary men 2023 jylǵy 7 qazanda HAMAS-tyń Izraıldiń ońtústigine jasaǵan shabýylynan qaza tapqandardyń jaqyndaryn biriktiredi.

Sonymen qatar aktsııaǵa Tutqyndar men habar-osharsyz ketkender otbasylarynyń forýmy da qoldaý kórsetti.

Narazylyq jeksenbi kúni tańǵy saǵat 6:29-da – byltyr 7 qazanda HAMAS shabýyly bastalǵan sátte – eldiń túrli qıylystary men jol aıyryqtarynda bastaldy. Aktsııalar Tel-Avıvtegi «Tutqyndar alańynda» jalǵasty.

Sondaı-aq narazylyq sharalary eldiń basqa óńirlerinde de ótýde, sonyń ishinde Izraıldiń soltústigindegi Batys Galıleıada jáne ońtústiktegi Eılatta jalǵasyp jatyr.

Jergilikti júzdegen bılik organdary, kásiporyndar, ýnıversıtetter, tehnologııalyq kompanııalar men basqa da uıymdar ereýilge qosylatynyn nemese qyzmetkerlerine qatysýǵa múmkindik beretinin málimdedi.

Aıta keteıik, Gazada Izraıldiń shabýylynan qaza taptqandar sany 62 myńǵa jaqyndady.