Izraılde Flydubai ushaǵynda erlik kórsetken jolaýshylar marapattaldy
ASTANA. KAZINFORM — Izraılde jolaýshylar ushaǵyna jasalǵan shabýyl kezinde erlik kórsetken azamattardy marapattaý rásimi ótti, dep habarlaıdy Kazinform agenttiginiń Taıaý Shyǵystaǵy menshikti tilshisi.
Beısenbi kúni Izraıl prezıdenti Itshak Gertsog Flydubai áýe kompanııasynyń FZ1073 reısindegi apattyń aldyn alýǵa kómektesken alty ızraıldikke azamattyq erligi úshin prezıdent medalin tabystady.
The Times of Israel basylymynyń habarlaýynsha, marapattaý rásimi prezıdent rezıdentsııasynda ótken.
Marapattalǵandardyń altaýy da Flydubai áýe kompanııasynyń reısimen ushqan Izraıl azamattary. ıAnıv Haıýn, Tsvıka Manes, Or Pardılov pen Asaf Radjýan ushaq komandırine pyshaq suqqan Oman azamaty – ekinshi ushqyshty ustap, shabýylyn toqtatty. Dáriger Shota Mýsaev jaralanǵan ushqyshqa shuǵyl medıtsınalyq kómek kórsetip, ómirin saqtap qaldy. Al Talı Manes oqıǵa týraly alǵash bolyp dabyl qaqty.
— Sizder el men búkil Taıaý Shyǵystyń taǵdyryna áser etýi múmkin iri avıatsııalyq apattyń aldyn aldyńyzdar, – dedi Itshak Gertsog.
I was honored to award 6 Israeli heroes of the flydubai flight with the Presidential Award for Civilian Heroism. I look forward to presenting the heroic Captain Smit Machchhar of India with the same award, once he fully recovers. The people of Israel salute you all! https://t.co/GRNKNH69fI
— יצחק הרצוג Isaac Herzog (@Isaac_Herzog) October 9, 2026
Izraıl prezıdenti ushaq komandıri Smıt Machchharǵa, áýe kemesin basqarýdy óz qolyna alǵan ushqyshtarǵa jáne jolaýshylardy qutqarýǵa atsalysqan ózge de adamdarǵa alǵys aıtty.
Gertsog oqıǵanyń mán-jaıyn tolyq anyqtap, jaýapty organdardyń áreketine tıisti baǵa berý qajet ekenin atap ótti. Bul málimdeme sheteldik áýe reısterin baqylaýda memlekettik organdar men qaýipsizdik qyzmetteri olqylyq jibergen bolýy múmkin degen aqparat aıasynda jasaldy.
— Osynda jınalǵan batyrlardyń erligi men tapqyrlyǵy bizdi tolyq jaýap alý mindetinen bosatpaıdy, — dedi ol.
Parlament saılaýy qarsańynda Gertsog qoǵamdy birlik pen yntymaqqa shaqyryp, marapattalǵan azamattardyń áreketi saıası kózqarasyna qaramastan, bir-birine qoldaý kórsete alatynyn dáleldegenin aıtty.
Azamattyq erligi úshin beriletin prezıdent medali 2023 jylǵy 7 qazanda HAMAS-tyń Izraılge jasaǵan shabýylynan keıin taǵaıyndaldy. Bul marapat — Izraıldegi beıbit turǵyndarǵa beriletin eń joǵary nagradalardyń biri. Ol óz ómirin qaterge tigip, ózgelerdi qutqarý jolynda erekshe batyldyq tanytqan azamattarǵa beriledi. Marapatqa úmitkerlerdi prezıdent janyndaǵy konsýltatıvtik komıtet qaraıdy.
Eske sala keteıik, Flydubai ushaǵyndaǵy oqıǵa 30 qyrkúıekte bolǵan. Jolaýshylar ekinshi ushqyshtyń áreketine tosqaýyl qoıǵannan keıin áýe kemesi Saýd Arabııasyna shuǵyl qondy.
Keıin ekinshi ushqyshtyń ushaqty Tel-Avıvtegi Ben-Gýrıon áýejaıyna baǵyttaýdy josparlaǵany belgili boldy.
