Izraılde bılik aýysýy múmkin: jańa úkimetti kim jasaqtaıdy

ASTANA. KAZINFORM — Izraıl prezıdenti Itshak Gertsog eldiń burynǵy Bas shtab bastyǵy Gadı Aızenkotqa jańa úkimetti jasaqtaýdy tapsyrý týraly sheshim qabyldady. Bul týraly Al Jazeera telearnasyna silteme jasaǵan Kazinform habarlady.

Izraılde bılik aýysýy múmkin: jańa úkimetti kim jasaqtaıdy
Foto: x.com / @IsraeliPM

Atalǵan sheshim týraly Aızenkotqa 7 qarasha kúni keshke habarlanǵan. Izraıl prezıdentiniń baspasóz qyzmetiniń málimetinshe, úkimet qurý jónindegi resmı mandat oǵan 8 qarashada tabystalady.

Gertsog bul sheshimdi 27 qazanda ótken parlamenttik saılaýdan keıin saıası partııalarmen júrgizilgen konsýltatsııalar nátıjesinde qabyldaǵan. «ıAshar» partııasynyń jetekshisi Gadı Aızenkottyń kandıdatýrasyn Knessettegi 67 depýtattyq orynǵa ıe partııalardyń ókilderi qoldaǵan. Al qazirgi premer-mınıstr Bınıamın Netanıahýdy 46 depýtat qoldaǵan.

Aızenkotqa bıleýshi koalıtsııany jasaqtaý úshin 28 kún ýaqyt beriledi. Qajet bolǵan jaǵdaıda bul merzimdi taǵy 14 kúnge uzartýǵa múmkindik bar.

Parlamentte basymdyqqa ıe bolý úshin 120 depýtattyń keminde 61-iniń qoldaýyna ıe bolý qajet. Alaıda saılaý qorytyndysy boıynsha Aızenkot bastaǵan alıans 48 orynǵa, al Netanıahý blogy 53 orynǵa ıe bolǵan. Qalǵan 19 mandat arab partııalaryna buıyrǵan.

Aızenkottyń kandıdatýrasyn usyný kezinde arab partııalarynyń bir bóligi ony qoldaǵanymen, saıasatker buǵan deıin olardyń ókilderin úkimet quramyna engizý múmkindigin joqqa shyǵarǵan. Sondyqtan koalıtsııa qurý úshin oǵan ózge saıası kúshtermen kelissóz júrgizýge týra keledi.

Eger Aızenkot belgilengen merzimde úkimet jasaqtaı almasa, prezıdent bul mandatty basqa úmitkerge tapsyra alady.

Al jańa úkimet jasaqtalǵanǵa deıin Bınıamın Netanıahý premer-mınıstr mindetin atqarýdy jalǵastyrady.

Buǵan deıin Izraıldegi parlamenttik saılaý qorytyndysy boıynsha negizgi saıası bloktardyń eshqaısysy úkimetti óz betinshe jasaqtaýǵa qajetti basymdyqqa ıe bolmaǵany habarlanǵan edi.