Izraılde áýe keńistigi jabylǵaly 40 myń týrıst elden shyǵa almaı qaldy

BEIRÝT. KAZINFORM – Izraıl men Iran arasyndaǵy shıelenistiń kúsheıýine baılanysty ondaǵan myń sheteldik týrıst Izraılde qalyp qoıdy, dep jazdy Anadoly.

Izraıl áýe keńistigi jabylǵannan keıin adamdar Ońtústik Kıprge ıahtamen kete bastady.

Izraıldiń Haaretz gazetiniń habarlaýynsha, áýe keńistigi jabylǵan soń, elden ketkisi kelgender ıahta arqyly Ońtústik Kıprge óte bastaǵan. Eskalatsııadan qashqandardyń qatarynda sheteldik týrıstermen birge keıbir ızraıldikter de bar.

Tel-Avıv mańyndaǵy Gertslııa teńiz portynda kóptegen adam teńiz arqyly evakýatsııa týraly kelissózder júrgizgen: biri – eline oralǵysy kelse, endi biri – shetelde júrgen balalaryn izdep barýǵa tyrysyp jatyr.

Qazirgi tańda shamamen 40 myń sheteldik týrıst Izraılden kete almaı otyr. Keıbiri Kıprge teńiz jolymen jetip úlgerdi, biraq mundaı saparlar shekteýli jáne óte qymbat.

Kishigirim ıahtalardyń ıeleri Gertslııa, Haıfa jáne Ashkelon sekildi jaǵalaýdaǵy qalalarda bir reıste 10 adamnan artyq alyp óte almaıdy.

Áleýmettik jelilerdegi arnaıy toptar arqyly uıymdastyrylyp jatqan evakýatsııaǵa suranys óte joǵary. Bılet baǵasy birneshe júzden birneshe myń eýroǵa deıin jetken. 

Buǵan deıin Haaretz gazeti Izraıl úkimeti otanǵa oralatyn azamattar úshin jiberilgen ushaqtardy elden ketkisi keletinderge paıdalanýǵa tyıym salǵanyn jazǵan.

Basylymnyń málimetinshe, 13 maýsym kúni Izraıldiń Iranǵa jasaǵan shabýylynan keıin bastalǵan eskalatsııa nátıjesinde 100–200 myń ızraıldik te shetelde qalyp, elge qaıta almaı otyr.

Eske sala keteıik, buǵan deıin AQSh elshiligi óz azamattaryn Izraılden evakýatsııalaı almaı otyrǵanyn jazǵan bolatynbyz.

Qytaı Izraıldegi azamattaryn elden ketýge shaqyrdy.

Lıtva azamattaryn Izraılden evakýatsııalaý bastaldy.